Page 11 - DESPA 20 JAN 2016

No tin ningun caso di virus di zika na Aruba
Publication: Wednesday, 20 January 2016. Categoria: General
Salubridad Publico ta sugeri muhernan na estado pa no biaha pa paisnan unda tin Zika

ORANJESTAD (AAN) – Maribelle Tromp, di Salubridad Publico, den un declaracion duna a
bay riba e tema cu hopi hende den mundo di salud publico ta papiando riba dje: e virus di zika.
Recientemente a keda anuncia cu na Colombia, cu ta cerca di Aruba, tin un cantidad grandi di
caso.
Tromp ta bisa cu ta un hecho cu e virus zika a plama hopi durante e ultimo añanan, for di
februari aña pasa cu Brazil a anuncia un “outbreak”. For di e momento ey Aruba a bay den
contacto estrecho cu organizacionnan di salud pa mira con e situacion aki ta sigui desaroya.
Pero recientemente CDC (un centro di control di malesa) a saca un comunicado di un alerta pa
biahenan pa Caribe y bisindario, cu ta inclui Aruba. Nan ta kere cu e comunicado ta causa panico
inecesario pasobra Aruba no tin ningun caso registra di zika.
Na di dos luga, na Brazil a mira efectonan, supuestamente, microcefalea, den babynan cu a nace
fin di aña. Pues, segun Tromp, no ta confirma cu ta zika a causa e defecto aki den e babynan.
Pesey nan ta conseha e hendenan pa evita di biahe pa e paisnan aki si nan ta na estado. E no ta un
prohibicion. Y ta conseha pa bishita dokter di cas of ginecologo pa conseho si kier biaha pa e
paisnan unda tin e virus di zika.
Pero tambe e ta bisa cu ta berdad cu desde aña pasa a haya shete (7) caso cu nan a haya
sospechoso. Tres di nan a manda muestra pa Hulanda, pero e resultado tabata negativo. Pesey
nan ta kere cu CDC tabata un tiki fuerte den su comunicado, locual ta normal pa nan den
situacionnan asina.