Page 8 - HOH

24 COMUNIDAD AWEMainta Diaranson, 26 Februari 2025

Wings of Hope celebrando carnaval cu adultonan mayor

Empoderando comunidad - reduciendo desigualdad

E team di Wings of Hope di Aeropuerto di Aruba
recientemente a organisa e prome celebracion
di carnaval riba diabierna 14 di februari 2025,

pa cliente y e trahadonan di Stichting Algemene
Bejaardenzorg Aruba (SABA), Huize Maris Stella y
Stichting Ambiente Feliz.

Cu mas di 200 cliente y personal presente di e casnan
di cuido, e team di Wings of Hope y e boluntarionan
a organisa un celebracion di carnaval inolvidabel
acompaña cu musica bibo di Robert Jeandor y su

Solo Banda Show, cuminda y bebida y un “photo-
booth” leuk pa warda e recuerdonan di e celebra-
cion. E evento a tuma luga na SABA San Nicolas den
oranan di mainta y den presencia di tur cliente y

personal. Wings of Hope Team a presenta na SABA
cu un “surround sound speaker” pa garantisa cu e
personal y e clientenan semper por disfruta di bon
musica regularmente durante dia.

SABA ta un fundacion priva cu ta brinda cuido
pa adulto y ciudadano di edad avansa di Aruba
dentro di tres facilidad, esta: Centro di Cuido (CDC)

na San Nicolas, Huize Maris Stella na Savaneta
y Verpleeghuis Oranjestad (VO) na Oranjestad.
Stichting Ambiente Feliz ta un fundacion p’esnan cu
un of mas discapacidad intelectual y ta enfoca riba

guia e clientenan pa bira mas independiente door di
siña nan habilidadnan nobo.

E celebracion di carnaval aki a enfoca riba e

Sustainable Development Goal #10, reduccion
di desigualdad y ta forma parti di e plan anual di
proyectonan social di Wings of Hope di AAA. P’e team
di Wings of Hope y e boluntarionan, esaki tabata

un manera perfecto pa garantisa cu nos grandinan,
incluyendo e personal dedica n’e casnan di cuido
aki, tambe por brasa e celebracionnan cultural di e
isla y experencia e temporada di carnaval.

AAA Wings of Hope tin un total di shete proyecto
social adicional programa p’e aña aki cu lo tin un
impacto positivo riba comunidad. Demostrando un

promesa pa construi un miho mañan, WoH lo sigui
empodera e comunidad, minimalisa desigualdad
y inspira e futuro generacionnan. AAA y WoH ta
hopi gradici na tur boluntario y demas gruponan

di servicio cu a haci e evento aki uno inolvidabel y
exitoso.