Page 21 - MIN VOS SEPT 18, 2015

A4

LOCALDiabierna 18 September

Presupuesto 2016: gasto di interes

Saliendo for di man?

Den e editorial aki nos a trata varios aspecto caba di presupuesto gubernamental. E biaha aki aten-
cion pa e categoria di interes riba debe publico. Esaki ta un parti importante di presupuesto anual di
gobierno. Segun cu debe a crece, interes cu ta paga a base di e sumanan biyonario aki tambe ta keda
subi. Nos no ta bay discuti ni trata e pregunta di ken ta responsabel pa cuanto di e debenan acumula
te awe. No cu esey no ta relevante en absoluto, pero pa resolve problema di awor en adelante e debate
ey no ta yuda nos.
E interes cu nos tin pa paga den e aña aki lo yega na algo mas di 200 miyon pa aña. Djis pa ilustra e
magnitud di e cifra ey con el a crece den e ultimo decada: na 2006 nos tabata paga ainda 97.4 miyon,
riba un debe cu e tempo ey tabata 2012.3 miyon florin. Na fin di 2014 nos ta papiando 3871 miyon di
debe y un interes di 187 miyon pa paga den e aña ey. Pa 2015 e debe acumula te fin di 2014 ta obliga
nos na un pago di algo mas di 200 miyon florin, y lo sigui crece si no bin un stop na e fiamento.
Awor, nos por mira yen di plan bunita pa pone blafon di gasto di 1350 miyon pa e añanan te 2018 pa
yega na un presupuesto balansa, pero den e tabel acompañante aki nos por observa cu te cu 2014 nada
no a cambia y e rumbo desastroso di gasto total riba 1400 miyon y entrada di apenas algo mas di 1100
miyon, ta keda causa fiamento na gran escala na un promedio di como 300 miyon pa aña.
Pa por duna un impresion di e crecemento di e gastonan di interes den ultimo decada, a relaciona nan
cu entrada total di gobierno. Esaki ta duna nos un idea di con bon of malo e capacidad ta pa paga e
nivel di interes aki ta desaroyando. Na 2006 gobierno su entrada total tabata 985 miyon y e interes
tabata 9,8% di e entrada aki. Na 2014 entrada total tabata 1114.4 miyon y interes 187.6 miyon pa un
porcentahe di 16.8%.

Loke por observa bon den e tabel aki ta cu e stancamento den entrada y e aumento grandi den gasto to-
tal durante e decada aki a incrementa e necesidad pa fia mas, loke a aumenta seguidamente e interes pa
e aña siguiente. Na mes momento, e aumento di interes mes a bira un factor den aumento di gasto total.
Den e ultimo añanan (2010 – 2015) interes a aumenta na un promedio di mas di 12 miyon florin pa
aña. E gastonan di interes entre 2006 y 2014 a crece cu 90 miyon, como 92%, mientras cu e entradanan
di gobierno na 2014 tabata apenas 129 miyon mas halto cu na 2006, un aumento di 13% so. Interes a
bira un parti cu hopi mas grandi di e gastonan fiho riba presupuesto di gobierno.
Esey nos por mira tambe na e porcentahe cu interes a bira di entrada total: di 9.8% te na 16.8 na 2014.
Na e momento aki e gastonan di interes, personal y bienes y servicio hunto ta yega na mas o menos
1050 miyon, casi e entrada total di gobierno. Pa resumi: nos ta fiando na un nivel di 300 miyon pa
aña, y ta pagando riba 200 miyon na interes caba.
Si nos no stop di fia di e manera aki, nos ta yega e punto unda nos ta fia 300 miyon pa paga 300 na
interes pa aña. Talbes e specialistanan financiero no ta conta asina y tin manera mas sofistica pa bisa
e mesun cos, pero e ciudadano comun lo por comprende asina den ki rumbo nos ta bayendo.q