Page 61 - MIN JUS 26 NOV 2015

PAGINA 26 DIARIO DIAHUEBS 26 NOVEMBER 2015

Minister a keda na palabra bashi:
Henter e aña sin haci algo pa combati problema

cu choller den area di Misa di Playa

ORANJESTAD (AAN) – Ta increible con Minister di Husticia
a laga e situacion di molester di choller den area di e Misa di
Playa, bay for di man.
Tempo cu a bin den publicidad tur e dañonan y e teror cu nan
tabata causando na e soernan cu tin nan lugar banda di Bonifacius
College, e propio minister a laga sa cu e situacion tabata bao di
control y cu a tuma medida, pa pronto kita e problema ey for di
man.
Pero no ta asina. A pasa casi henter un aña cu no a haci net nada,
y por mira con nan ta teroriza esnan encarga cu Misa di Playa, y
tur esnan biba den e vecindario di Rosa College, etc.
Peor awor cu nan tin ocupa e edificio di ex Instituto di Cultura y e
edificio pega na dje, unda cu antes Departamento di Relacionnan
Exterior y Oficina di Coordinacion di Asuntonan di Droga tabata
ubica.
Razon tin un parlamentario cu hopi biaha ta critica e minister
pasobra ta obvio cu e no tin un maneho integral riba tereno di
seguridad y e chollernan ta actua pa nan cuenta como sifuera
edificio cu nan ta acapara ta bira nan propiedad priva.
Matutino DIARIO a yega di scucha cu algun persona kier a
organiza un accion di firma, pero nos no a bolbe sa nada di esaki.
Kizas ta necesario pa bin cu un accion di firma y un manifiesto di
e bisiñanan afecta pa Parlamento, pa mira wak si tin un manera
cu por stop e chollernan di abusa di e manera aki!
Manera e situacion a bolbe sali afo por mira cu e minister a keda
na palabra bashi so, pero concreto absolutamente nada pa pone
fin na e problema aki.

Telefonnan di DIARIO 582-6747
Fax 582-8551