Page 94 - MIN VOS JULY 13

AWEMainta Dialuna, 13 Juli 2015
Historia pa Aruba
Nicole van der Velden y
Thijs Visser a CLASIFICA
pa Weganan Olimpico Rio
2016
17
NUNCA antes un atleta di Aruba a clasifica p’e
Weganan Olimpico. Semper a warda cu hopi
pasenshi p’e dia tan anhela aki yega.
Awor nos por bisa cu porfin e dia aki a bira uno oficial.
Clasifica un atleta p’e Weganan Olimpico 2016 di Rio
de Janeiro bira un realidad.
E duo Arubano den e deporte di sailing, Nicole van
der Velden y Thijs Visser, conoci tambe como Flying
Arubies a logra nan meta poni for di dos aña pasa pa
bira e prome atletanan di Aruba cu lo clasifica p’e
Weganan Olimpico di Rio 2016.
Durante henter e siman pasa e dos atletanan di Aruba
a competi den e campeonato mundial di Nacra 17 na
Aarhus, Dinamarca, cual campeonato tabata conta
p’e clasificacion Olimpico.
E disciplina di Nacra 17 den sailing t’e specialidad di
e atletanan di Aruba.
Despues di tres dia di competencia, Nicole y Thijs a
lucha duro pa mantene un bon posicion p’asina logra
e momento historico pa Aruba.
Den tres dia di competencia e duo a logra un di 5, 3
y 16 lugar bon pa un di 6 lugar overall faltando un
dia di competencia mas pa bay.
E concurencia tabata fuerte specialmente di
Alemania, Hulanda, Italia y Dinamarca mes. Asina
mes Nicole y Thijs a wanta duro y no a laga e
clasificacion aki pasa nan bay, cu dos man nan a gara
e oportunidad unico aki.
Cu e clasificacion aki Nicole y Thijs a
bira parti di e historia di e deporte Arubano.
Mester bisa cu pa Nicole van der Velden y Thijs Visser
e dos añanan di prueba sigur no a bay facil, ambos
atleta a pasa den duro cu hopi ups and downs, pero
nan nunca a perde e speransa den nan soño, hopi
sacrificio a ser haci pa logra e momento historico
aki pa Aruba.
Pa Comite Olimpico Arubano esaki ta un di e
momentonan mas feliz di e organisacion.
Un pabien na Nicole van der Velden y Thijs Visser cu
nan clasificacion p’e Weganan Olimpico Rio 2016.
Aruba completo ta orguyoso di boso.