Page 20 - AM210605

20 AWEMainta Diasabra, 5 Juni 2021

UN SNECHI DI PALABRA DI DIOS

CORPUS CRISTI 6 di juni 2021 Nr. 314

I lect: Ex 24,3-8
Salmo: 116
II lect: Heb 9,11-15
Ev: Mc 14,12-16.22-26

Riba prome dia di fiesta di pan sin yeast, ora ta mata e lamchi pa cena di Pesag, Hesus su discipelnan a puntr’E:
“Unda Bo kier pa nos bay prepara cena di Pesag pa Bo come?” Hesus a manda dos discipel bay y ordena nan:
“Drenta ciudad. Aya boso lo topa un homber cu ta carga un tinashi di awa; siguie. Bisa doño di e cas caminda e
drenta: ‘Maestro ta puntra: unda e sala ta caminda Mi por tene cena di Pesag cu mi discipelnan?’ E doño di cas lo
mustra boso un sala grandi ariba, muebla y cla prepara caba; ey boso mester prepara tur cos pa nos.” Mientras nan
tabata come, Hesus a coge pan; El a gradici Dios, kibra e pan y duna su discipelnan. “Tuma, esaki ta mi curpa,” El
a bisa. Despues El a coge un beker di biña, yama Dios danki pa e beker y pas’e pa nan; y tur a bebe for di dje. El
a bisa: “Esaki ta mi sanger, cu ta confirma e aliansa; e sanger cu lo ta drama pa hopi hende. Mi ta sigura boso cu
lo Mi no bebe biña mas te dia Mi bebe biña nobo den reino di Dios.”
Despues di a canta himno, nan a sali pa Sero di Oleifi.

Palabra di Señor.

MENSAHE

Apostelnan di Hesus ta haci preparacionnan necesario pa celebra fiesta di Pesag.
Hesus ta duna nan ultimo instruccionnan y ta parce cu tur cos ta cla. Hesus ta prepara
pa e celebracion aki. E ta unico consciente cu e celebracion aki ta bira diferente cu
den pasado, ora a recorda liberacion di sclabitud di Egipto. E celebracion aki lo tin
gran contenido: proclamacion di ley di amor, un cena cu ta duna inicio na Santa
Eucaristia y institucion di orden sacerdotal.
Apostelnan ta prepara pa e celebracion aki?

Awe nos ta celebra e solemnidad di Corpus Cristi.

Nos ta trata pa profundisa e misterio di presencia di Hesus den Sacramento di Eucaristia. Awe nos ta keda invita
pa adora Señor Hesus presente den Santa Comunion. Nos ta celebra procesionnan eucaristico. Eucaristia, Santa
Comunion, Ricibimento, Adoracion semper lo keda pa nos un gran misterio.

Nos ta prepara pa celebra e misterio aki?

Nos ta prepara pa ricibi Hesus den Santa Comunion na un manera digno y disfruta di Su presencia. Di ador’E y
alab’E presente den cada hostia cu nos ta ricibi?

Eucaristia ta presencia real di Hesus. Ricibi Hesus kiermen ricibi Dios mes. Ricibi Dios ta pidi un preparacion spe-
cial. Minimo, nos mester cumpli cu nos confesion regular pa nos tin un alma limpi. Ricibi Hesus den pica grave ta
un sacrilegio. Un persona cu no ta confesa minimo un biaha pa aña no ta digno pa ricibiE. Pa ricibi dignamente nos
mester kere cu ta Hesus nos ta ricibi y consciente di e realidad aki ta bon pa haci un ora santa prome cu ricibi of
minimo un oracion personal prome y despues di ricibi.

Bo ta prepara pa ricibi Hesus Eucaristico?

ORACION

Alaba sea Hesus den Santisimo Sacramento di altar.

PROPOSITO

Pone mas atencion riba preparacion pa cada Santa Comunion.