Page 57 - MIN ECEM

Mike Eman: Carlos Bermudez tin balentia, curashi y ta un
trahado duro pa pueblo

Sunday, 04 June 2017 20:22
Comparti

Prome Minister di Aruba y lider di AVP a yama Carlos Bermudez bon bini oficialmente riba e lista berde durante e
lansamento cu a tuma luga diasabra anochi na Boegoeroei.
Dilanti di un publico grandi consistiendo di pueblo di Noord, simpatisantenan y candidatonan di AVP, Eman a haci
bon cla cu e districto y nos pais a gana un profesional cu curashi y capacidad pa traha pa progreso.
“Boso tur ta sinti e emocion ora cu bo kier pa e destino di bo pais wordo goberna cu preocupacion, cu compromiso;
ora bo kier pa bo bario tin representantenan cu tin nan lombrishi dera den e bario; cu bo kier pa nan representa y
awe nochi no tin miho persona cu Carlos Bermudez pa representa e pueblo di Boegoeroei y e pueblo di Noord,”
tabata e palabranan di e lider di AVP.
Hunto cu Bermudez riba scenario di e evento, Eman a reflexiona riba e amistad largo entre su persona y famia
Bermudez. A recorda con e y Wim Bermudez tempo cu nan tabatin 17 aña tabata traha na Emco drentando 5’or di
atardi y saliendo te 7’or di e siguiente mainta. “Despues di aña di experiencia di conoce e famia aki y conoce nan
honestidad, nan integridad, nan balentia y stimacion pa e pais aki, mi ta sigur cu Wim for di shelo ta bisa: ‘Mike mi
ta para hunto cu bo y mi ruman pa sigui goberna e pais aki y mi ta para tras di e homber aki.’”
Eman a gradici famianan grandi den Noord cu semper a sostene den tempo bon y den tempo malo.
Famianan Bermudez, Tromp, Franken, Frank, Christiaans y Eckmeyer. “Nos a traha duro tempo cu
Watty Vos, Henny Eman y Marco Christiaans tabata libera partido. Si mester a parti pamflet, traha te
marduga, pega bandera y papia cu hende, nos a haci’e. Nos a sirbi nan pasobra nan a inspira nos y pesey
nos ta para aki awe paso nos a tuma e antorcha pa sigui e trabou y sirbi e pais aki. Y cu e antorcha ey nos
lo marcha y nos lo lucha pa dia 22 di september nos celebra 15 asiento pa partido AVP,” Eman a bisa cu
gran emocion cu e publico su dilanti a reacciona mescos cu n’e.