Page 2 - AM211013

2 AWEMainta .com
Decision di Corte Superior ta confirma fayonan di Ministerio Publico
“Gebrekking administratie” wordo considera
como labamento di placa cu ta hopi serio
Ayera merdia Corte Superior den su sentencia den e
caso IBIS, a confirma fayonan barbaro cu Ministerio
Publico di Aruba a bin ta haciendo pa un tempo caba
y caminda a trata di coregi e fayonan aki, pero e
sabor amargo ta keda.
Un di e decisionnan den e caso aki tabata esun cu
Ministerio Publico a lanta contra di Melany Croes
Paesch, esposa di e acusado mayor Paul Croes,
caminda el a wordo acusa di entre otro labamento
di placa.
Un acusacion serio, sumamente serio ya cu
labamento di placa ta algo castigabel practicamente
den tur pais y no ta algo cu sin mas por acusa un
ciudadano di esaki si no tin prueba contundente y
legal si esaki lo por a tuma lugar.
For di inicio di e caso aki, ora cu el a wordo trata den
Corte di Prome Instancia, tabata bisto cu e acusacion
aki contra di señora Croes-Paesch, tabata un asunto
di “tira para” pa Ministerio Publico tin algo pa mustra
pueblo cu lo tin algo serio.
Ayera merida Corte Superior a dicidi cu Melany
Croes Paesch no ta culpabel n’esaki y ta absolve
su persona di e acusacion aki, ya cu loke a wordo
presenta como prueba pa Ministerio Publico y su
Fiscalnan “piscado” tabata un asunto di “gebrekkig
administratie” y nada mas.
Na Aruba den negoshinan grandi, hasta den maneho
financiero di Gobierno manera presupuesto,
tin pruebanan concreto y cla di “gebrekking
administratie” cu despues ta wordo coregi y den caso
di señora Croes-Paesch el a demostra esaki ora cu el
a laga traha un raport riba e administrascion cu el a
hiba den cual practicamente el a aclaria e situacion.
Corte Superior cu esaki a “tik’ riba dedenan di
Ministerio Publico, cu ultimo tempo a transforma nan
mes den un grupo di “heksenjagers” formando parti
di algun complot politico sin sentido caminda den
dos otro caso pendiente, tambe a acusa politiconan
manera Otmar Oduber y Benny Sevinger, di lo a haci
nan mes culpabel na labamento di placa.
Un acusacion conoci den boca di pueblo como “tira
Chana pa gana Juanita” y esaki a wordo confirma
ayera cu e decision di Corte Superior cu si a haya
e acusado aki culpabel di tabatin un persona den
servicio na su cas, sin permisonan legal pa t’eynan y
pa traha n’e cas.
Diaranson, 13 October 2021
Un hecho cu si e mesun Fiscalnan aki y Ministerio
Publico di Aruba t’asina bon na altura di loke e ta
haciendo, ta un asunto cu ta tumando lugar n’e
momentonan aki, den cantidad di negoshi, cantidad
di cas di famia caminda ta emplea hende cu no tin
permiso ni di estadia, pa haci cierto trabounan ya cu
nan a forma parti di e asina yama “cheap labor.”
Melany Croes Paesch tabatin tur razon di apela e
decision di Corte den Prome Instancia, cu tambe
mester a mira e cosnan aki, pero pa un of otro motibo
a dicidi cu e acusado aki ta culpabel pero sin duda
esnan den e decision aki, tambe por a ripara cu aki ta
trata di un asunto manera Corte Superior a cataloga,
esta un caso di “gebrekking administratie.”
Aki na Aruba ta conoci cu tin ilegalnan trahando
na hopi caso di hende, na hopi negoshi den tur
sector, hasta e sector turistico cu no ta cumpli cu
e documentonan necesario, pero nunca antes un
hende a wordo deteni y a haya castigo di Corte
p’esaki.
Na cantidad di proyecto den construccion, Guarda
Costa a yega di gara ilegalnan trahando, a parti
un multa den algun caso, den otro casonan no,
pero nunca a scucha c’un comerciante a wordo
treci dilanti mesa berde p’e wordo haya culpabel y
sentencia na trabou comunitario manera t’e caso cu
señora Croes Paesch.
A yega tempo pa Ministerio Publico bira mas serio,
principalmente bira mas husto den su accion y su
decisionnan y no mal usa e poder hudicial cu nan tin
pa nan tambe actua di un forma cu no ta hustifica.
Ta bon pa usa un dicho Biblico aki na final, esta
manera Jesus a yega di bisa: “Esun cu no a peca, tira
e prome piedra.”