Page 25 - UTILITIES OCT 8, 2015

Minister Mike de Meza a reuni cu contratistanan riba desaroyonan pa un posibel
reapertura di e refineria
Thursday, 08 October 2015 08:57

Comparti

Tin mas interes ta creciendo mey mey di contratistanan cu kier topa cu Minister Mike de Meza, mirando
cu tin desaroyonan positivo pa posibel reapertura di refineria.

Minister de Meza a comenta cu el a wordo bishita pa 4 di e contratistanan cu semper a traha den e
refineria. Nan tabata kier un update y e compania Wescar tabata tey, Doushar, Wegenbouw Albo y tambe
Mourik tabata tey. Nan a bisa tambe cu nan no a haya tur e otronan cu kier a invita. De Meza a splica cu e
lo sinta cu tur den un futuro cercano, pa asina duna un update con ta bayendo cu e evaluacionnan. Con ta
bayendo, unda ta para pa loke ta e posibilidadnan pa loke ta e refineria. E tabata den un caracter general,
caminda cu nan kier a haya mas informacion y na mesun momento a trece dilanti nan preocupacion.

Loke nan a trece dilanti ta pa wanta consideracion pa ora cu actividadnan tuma lugar cu semper e
mercado local ta esun cu ta bin dilanti mas tanto cu ta posibel. Esey tambe ta e posicion di gobierno cu si
mañan cu tur cos conclui positivamente, automaticamente mester tin proteccion pa e mercado laboral
local, segun Minister de Meza.

Citgo na Aruba

For di siman pasa Citgo a manda su expertonan Aruba. Citgo ta bezig cu e due diligence cu a acorda.
Segun e minister, durante e luna di October, luna di November y December, continuamente ta bay tin
diferente hende di Citgo cu ta bin Aruba pa haci e Due Diligence pa loke ta e refineria. Esey ta bay ta
constante.

Esaki ta un evaluacion tecnico economico, esta Due Diligence. Ta haci inspeccion, ta papia cu e
personanan, ta haci evaluacionnan cu nan, ta revue documentacion, ta revue diferente dato si tin
pregunta, ta haci diferente assessment. Esaki ta un evaluacion basta profundo y detaya cu nan mester haci
y tin mester hopi tempo pe. Normalmente tres luna ta cortico, pero p’esey mes constantemente nan ta bin
Aruba y tambe riba nivel cu gobierno lo combersa cu nan. Lo cuminsa repasa diferente detaye pa un
posibilidad pa Aruba, cosnan cu di parti di gobierno di Aruba lo wordo poni riba mesa tambe cu nan lo
mester cumpli cun’e y lo tin otro rekisitonan di nan banda cu nan lo mester mas informacion di gobierno
di Aruba. E negociacionnan cu normalmente ta tuma lugar ora ta bezig cu un proyecto asina grandi.

Pa December lo mester tin un contesta si e ta un go ahead. Si nan a caba cu nan evaluacionnan y si nan a
haya nan datonan, cu nan a haci nan evaluacion y cu nan dicidi pa bay pa e siguiente fase. E siguiente fase
ta pa sinta cu nan y cu Valero pa negosha e diferente convenio y contractnan, con ta bay haci un transfer
di un pa otro. Lo mester concretisa esaki den documentacionnan hopi formal y esey lo ta e siguiente fase.
Una bes esey tuma lugar, e ora por bisa cu nan a tuma over e refineria y prepara pa bay den trabaonan di
refineria cu ta mantencionnan grandi, turn around y prepara pa un operacion sigur.

Un turn around asina aki despues di 3 aña, por bisa cu por tuma lugar un aña y mey. E inversionnan ta
inversionnan grandi, segun e minister. Por ripara esaki den e economia como pais, e mandatario a
termina bisando.