Page 32 - ATA

42 Djabièrnè 6 Aprel 2018
Dòk, CPA, Isla i Aeropuerto ta sinti e efekto
Situashon na Venezuela a dal
ekonomia di Kòrsou duru
WILLEMSTAD. - Mas ku
henter e asuntu di barkunan
di fruta/berdura ku no ta bin
Kòrsou mas, e desaroyonan
na Venezuela tin un impakto
funesto pa ekonomia
kompleto di Kòrsou. Un
investigashon ku EXTRA a
hasi ta ilustrá ku mayoria
di sektor importante di
ekonomia ta sintiendo e
impakto. Ademas mester
tene kuenta ku e “spinoff”
ku tambe ta bai pèrdí loke
ta redundá den algun
mion dòler di pèrdida
tantu direktamente komo
indirektamente.
Un sektor seriamente
afektá ta Dòk kaminda
Damen a kuminsá ku masha
entusiasmo i perspektiva
pero a hañ’é apénas algun
luna despues ku a sera un
dil di término largu ku e
situashon ku tankeronan
no ta bin dje tantu ei
mas manera a kalkulá. E
kompania ta tratando di
kompensá e situashon ku
reklutashon di barkunan
riba merkado internashonal.
Un gerente di Damen a
konfirmá ayera e impakto
ku e situashon na Venezuela
tin pa e kompania.
Den sierto sentido e
situashon ta mishi ku
e proyekshonnan di e
kompania pero e kompania
ta sigui optimista pa loke ta
trata futuro.
Otro kompanianan
ku ta sinti e efekto ta
Refineria Isla, CPA i KTK.
E ménos aktividat ku tin
tin reperkushon tantu
pa kompanianan ku ta
dependé di e sektor aki
manera CPA i KTK pero
tambe reperkushon pa e
produkto nashonal bruto
(BNP) di Kòrsou, Ménos
aktividat den haf di mes
tin reperkushon pa e dos
kompanianan importante
aki. E kompania di haf a
anunsiá ku mester sigui
baha gastu. Resientemente
a sirkulá un portrèt riba
medionan sosial di un gran
kantidat di toubot ku ta
pará pòrnada sin trabou.
EXTRA a reportá poko
dia pasá riba e impakto di
e situashon na Venezuela
tin pa turismo en general
pero prinsipalmente pa
aeropuerto di Kòrsou. E
entradanan di Curaçao
Airport Partners pa konsepto
di pasaheronan ku ta
bishitá Kòrsou, ta paga e
impuesto di salida i ta trese
aktividatnan komersial
na aeropuerto ta bou di
preshon.