Page 7 - HOH

8 LOCAL AWEMainta
Nos por tin igualdad di berdad
of djis e mascara di dje?
DEN e mundo di awe, nos ta papia hopi di igualdad—den
politica, na trabou, den espacionan publico. Riba superficie,
nos ta celebrando “diversidad,” “inclusion,” y “oportunidad
igual” mas duro cu nunca. Pero ora bo kita e capanan, un
pregunta mas dificil ta surgi: nos ta construyendo igualdad
real, of djis bisti un mascara riba e mesun sexismo di semper?
Nos ta mir’e tur ora.
Companianan ta promove un par di hende muhe den lider-
azgo y pone nan potret riba brochure—pero tras di porta
cera, decisionnan ainda ta ser tuma pa homber. Hende muhe
ta wordo elogia pa “kibra barera,” pero ta pidi nan pa smile
mas den reunion. Empleadonan femenino ta haya “un asiento
na mesa,” djis pa despues wordo interumpi, ignora, of husga
mas severo cu nan coleganan masculino.
Esaki ta loke nos kier men cu igualdad falso—e ilusion di
husticia cu ta sconde e realidad di midi cu dos medida.
Sexismo no a desaparece. E djis a cambia paña. E ta mas
cortes, mas sutil—pero mesun peligroso. Y den hopi sentido,
e ta mas dificil pa denuncia awor, pasobra riba papel, tur cos
ta parce igual. “Mira,” nan lo bisa, “Nos tin hende muhe den
e directiva!” Pero nan ta ser scucha? Nan ideanan ta haya
fondo? Nan ta ser husga cu e mesun standardnan?
Diahuebs, 30 October 2025
Y no ta djis na trabou.
Den publico, hende muhe ainda ta wordo husga pa con nan
ta bisti, con duro nan ta papia, of con nan ta cria yiu. Online,
bosnan femenino ainda ta e blanco di acoso mucho mas hopi
cu nan coleganan masculino. Den relacionnan, e presion pa “ta
menos” of “compromete mas” ainda ta cay di forma desigual.
Pues, nos por tin igualdad di berdad si e ta djis un actua-
cion?
E berdad duro ta: no—no si nos keda acepta mascara en luga
di cambio real. Igualdad no ta bin di ‘quote’ of hashtag so. E
ta bin di revisa poder, desafia prehuicio inconsciente, y scucha
profundamente e experiencianan di esnan cu ainda ta ser trata
como “menos cu”—hasta ora e ‘brochure’nan ta bisa otro cos.
Y aki ta e punto crucial: Ta spera cu hopi hende muhe ta
hunga e wega. Pa nan smile y wanta, pa acepta e victorianan
simbolico como suficiente, pa evita di ser tilda como “dificil” of
“mucho emocional” ora nan papia. E ta agotador. E ta inhusto.
Y e ta mantene e circulo ta draai.
Si di berdad nos kier igualdad, nos mester haci pregun-
tanan mas dificil. Nos mester denuncia gestonan performa-
tivo y exigi substancia. Nos mester sostene hende muhe (y tur
bos marginalisa) no djis ora nan gana premio, pero ora nan
enfrenta resistencia, “burnout”, of invisibilidad.
Ta ora pa kita e mascara.
Pasobra igualdad mester ta mas cu un bon potret of un
“checkbox”. E mester sinti como siguridad. E mester zona
como husticia. Y e mester mustra manera poder real ta ser
comparti—no djis fia.