Page 13 - MIN SOC DEC 28,2015
P. 13
Un empleado publico ta representa e pais
Publication: Monday, 28 December 2015. Categoria: General
y mester ta consciente con e ta anda cu tur cos cu ta envolvi den su trabao.
ORANJESTAD(AAN): Na november DRH a manda un conseho tocante maneho
(“beleidsadvies”) pa minister, kende na su turno a compartie cu Ministerraad, riba con pa anda
cu social media.
Omaira Lares hefe di e departamento di recursonan humano di gobierno a subraya den un
entrevista, cu tin un liña fini entre “recht op privacy y openbaarheid” y maneho y loke ta ta
deseabel ta un maneho ekilibra y balansa cu no ta bay contra ningun ley y na mes momento ta
proteha e amtenaar pa e no bay den extremo cu su expresionnan.
Tin leynan vigente, pero no por ta asina tampoco cu un persona cu ta un funcionario publico, y ta
pues den un funcion di ehempel, ta subi social media y insulta un mandatario, su dunador di
trabao, su hefe of colega. Esaki no ta pas pa un empleado den ningun negoshi y sigur no pa un
empleado publico.
El a duna como ehempel cu na DRH e empleadonan no tin aceso na ningun red social riba
computernan di trabao y tambe tin un protocol encuanto di con ta anda cu materialnan di trabao,
manera tablet y laptop ora cu nan ta hiba esakinan for di oficina pa traha for di un otro luga.
Tin tambe diferente website cu ta prohibi, manera esunnan cu ta relaciona na terorismo y ta
prohibi uzo di USB sticks pa preveni cu cualkier virus ta wordo importa den e computernan di
DRH.
Un tablet di trabao di DRH ta costa entre 4 pa 5 mil florin y mester wordo cuida debidamente.
Tin cu pone atencion na materialnan di trabao, e empleado ta firma pa por uza nan y mester ta
consciente di kico su trabao ta, Lares a bisa.
Un empleado publico ta representa e pais y mester ta consciente con e ta anda cu tur cos cu ta
envolvi den su trabao.
Pa cu documentonan tambe a introduci un “clean desk policy” na DRH, pues cu ningun
documento por keda riba e lessenaar di e empleadonan ora cu nan no ta na trabao. Asina DRH ta
proactivo den proteccion di e informacion di empleadonan publico y otro temanan confidencial
cu nan ta traha cune.
Pues, si ladron drenta pa horta mes den DRH of personanan cu mal intencion kibra drenta den e
edificio, nan no lo haya documentonan habri y accesibel riba ningun lessenaar.
http://www.diario.aw/2015/12/un-empleado-publico-ta-representa-e-pais/
