Page 16 - DESPA

Tin hende confirma cu Zika na Aruba cu a bin di Suriname

Publication: Tuesday, 26 January 2016. Categoria: General

Caso no di Aruba pero importa:

ORANJESTAD (AAN): Na Aruba te ainda no tin ningun caso confirma pa laboratorium local
riba e virus di Zika. Mientrastanto esey no necesariamente nifica cu no tin hende infecta.
Actualmente na Aruba tin un pareha cu e bolbe di Suriname cu tin Zika.

E pareha aki ta biba pariba di brug y GKMB a bai tambe fliet tur rond di nan cas. Pa no causa
panico e departamento di Salubridad Publico ta confirma cu na Aruba no tin ningun caso
registra. Eynan nan tin razon tambe.

Pero di otro banda nan ta na altura di e resultado di e test di e pareha aki y mescos GKMB tambe
ta na altura di e resultado cu e pareha aki tin den nan poder haci na e laboratorium den exterior
cu ta Suriname.

E informacionnan di precaucion a wordo duna. Ta wordo menciona cu na Playa tambe tin un
caso confirma pero esaki no por a haya informacion oficial riba dje. Esun pariba di brug so ta
mas bien confirma mirando e resultado cu e pareha mes a trece hunto cu nan. Casonan
sospechoso tin hopi y testnan ta wordo manda laboratorium tambe.

Tur test cu a bai te awor aki ta negativo. Na momento cu haci un test pa un sospecho, mesora ta
activa e team completo. No ta warda te ora e resultado bin bek. Esaki ta loke ta tumando lugar
segun Salubridad Publico a laga sa tambe durante combersacion.

Bisti panjanan largo pa evita picadura ta djis un di e ehempelnan. GKMB ta
bai na nan cas spuit y haci e control y tambe den e area di nan cas te na cierto distancia. Zika no
ta algo cu a nace awe.

E ta existi algun anja caba y GKMB mes a bai cursonan riba e tema aki algun anja pasa. Nan sa
bon bon di Zika. Loke a pasa ta cu awor e ta yegando mas y mas y area di Caribe. Prome ta
Dengue, despues Chikungunya y awor Zika.

Hendenan ta manera perde cabez ora tende di algo nobo pero nan mes no ta busca un manera di
evita criadero. Den algun luna lo bo tende di otro sangura of Virus y djey Zika tambe ta wordo
lubida. Esey ta e trend cu tin unda hende ta perde cabez.