Page 31 - testmergebrochureV0704_2

Am Ufank stung eng Iddi...
Geschicht vun der Leidelenger Musek

1893- 2018

..an der Iddeen sinn et der 1893 e ganze Koup op der Welt
doruechter ginn déi Succés haten. Fir der nemmen e puer ze
nennen; den Dieselmotor ass gelaf, zu New York ass e
Geschwindegkeetsrekord mat 181 kmh vun enger Lokomotiv
opgestallt ginn an, déi 3 éischt Bänn vum Karl May sengem
Winnetou sinn eraus komm, an musikalesch gekuckt ass de
Münchener Philharmoneschen Orchester gegrënnt ginn.

Ons interesséiert awer eng aner Iddi, déi eppes an deem deemols
klengen Duerf Leideleng entstoe gelooss huet. Et ass d'Grënnung
vun der Leidelenger Musek, engem Veräin deem seng 125 Joer mir
feieren. Loosse mer awer e puer Joer zréck goen an der Geschicht,
well d'Grënnung vun desem Veräin war nëmme méglech well dee
néidege Kader bestanen huet. An dësem Fall war dat ganz kloer eng
Gemeng, een Duerf. Ouni Duerf gëtt et nämlech keng Duerfmusek.
Wéi dunn am Joer 1856 d Gemeng Leideleng, lassgeléist vun der
Gemeng Riedgen, enstanen ass wor de Kader geschaf fir d'Entstoen
vun alle méglechen lokalen Associatiounen. An dach huet et net
manner wéi 37 Joer gedauert bis d'Iddi stong fir eng Musek ze
grënnen, an des Initiativ ass net emol direkt vun engem Stack-
Leidelenger ausgaang mee vum engem jonke Käler deen op
Leideleng abestuet gi war, an sech hei an deem Duerf direkt wuel
gefillt huet.

Et wor den Michel MARX-SEILER deen d' Initiativ agraff hat, an de
Gronsteen geluegt huet vun onsem Museksveräin. Zu Leideleng sinn
et zu där Zäit musekbegeeschtert Leit ginn déi sech mat Freed deser
flotter Initiativ ugeschloss hunn. Gläichzäiteg gouf et zu Lëtzebuerg e
wirtschaftlechen Obschwong duerch d'Eisenindustrie, an et wor all
Bierger méglech där Fräizäitaktivitéit nogoen, déi him zoussot.