Page 2 - kapidaraan canva book-el_Neat
P. 2
Matan imbah ashar piragah Galuh pina lain. Kada biasanya inya hamuk kada
karuan. Mata saharianan kada taguring. Sayu kadada sumangat, batis lawan
talinga dingin. Pucat kakuning-kuningan. Uma lawan Abahnya maka samalaman
manggaduhi kada tapijim mata. Napa tih Galuh pina awak kujul-kujul cariwit kada
singampihan sampai katangah malam. Ulun nginumi ubat sudah, ujar Abahnya
dikaroki lawan bawang kancur sudah jua. Muhanya sayu mambari maras.
"Kurr sumangat, anakku bauntung baiman. Kanapa pian jadi kaya nginih. Dua hari
hudah pian kadada talihat sihat." Ulun menggarunum dalam hati.
Ngaranya masih kanakan halus bepandir gin kada tapi jalas. Uma Abahnya rasa
manggaring mamikirakan. Imbah tangah hari, Galuh ulun bawa bakunjangan ka
warung, manukar ubat masuk angin kalo pina kaina ampih panas.
"Nangapa si Galuh pina lamas, Mah. Garingkah?" ujar Acil Dayah managur Galuh
nang masih dalam gindungan.
"Inggih Cil ai. Cariwit samalaman, awak panas." Acil Dayah menjapai batis Galuh.
"O.. Amah, anak ikam nih pinanya kapidaraan, Mah ai."
"Napa nintu kapidaraan, Cil?." Ulun takajut, kada suah mandangar istilah nintu.
"Kapidaraan nintu kataguran urang subalah. Ngarannya kanakan halus nih Mah ai
mun ada nang suka ujar urang, atawa digayai bisa timbul sakit kadada sababnya.
Ikam bawa gin wadah Nini Atul. Biasanyalah imbah Ashar pang sidin
manjapaiakan, Mah ai. Lakasi sudah dijapaikan sidin, tampulu sawat lagi."
