Page 3 - kapidaraan canva book-el_Neat
P. 3
Sapajangan jalan manuju karumah. Ulun manggarunum sorangan, mamikirakan
pandiran acil Dayah. “Iyakah anakku nginih kataguran urang subalah, kah yo?. Kaina
ai nah bepadah lawan Abahnya".
Hari parak sanja Abah Galuh kadada sing bulikan. Urang bang sudah lawas. Abah
haji Sukur hudah bulikan datang masigit. Sadang hudah ulun mahadang. Wajah
Galuh talihat magin pucat. "Amun manunggui Abahnya bulik, sawat anak kada ta
antar lagi wadah Nini Atul nintuh." Garunum ulun dalam hati.
"Bismilahirahmanirohim." Badadas ulun mambawa Galuh kawadah Nini Atul. Talihat
Nini Atul dudukan di hambin sambil mamamah sirih lawan pinang.
"Assalamualaikum, Ni." Ulun tagur sidin nang asyik Mamamah sirih kinyul-kinyul.
"Waalaikumsalam." Nini mahawasi lawan mata bekidip-kidip. Maklum nini Atul nintu
dukun beranak kampung nang hudah tuha. Umur tujuh puluhan labih, ada saku.
"Haurankah, Ni?"
"Kaya ini pang sudah, mun kadada ayam sunyi am rumah, Nak ai."
"Ni, japaiakan pang anak ulun, kanapa yo ni cariwit tarus saban tangah malam,
awak panas. Hudah ulun kinumi ubat, kadada jua ubahnya."
"Kurr.. sumangat cucukku. Kada papa cuklah. Berapa hudah umurnya."
"Dua tahun satangah, Ni ai. Rahmah ngarannya, ulun kiyau Galuh ai saban hari."
