Page 5 - kapidaraan canva book-el_Neat
P. 5
"Nah sudah am, nini tandaiakan. Urang subalah bejauhlah, jangan ditagur-tagur
cucu unda." Nini measuh Galuh dibariakan ka asuhan ulun.
"Kanapa tih kanakan halus rancak ditagur urang, Ni."
"Kanakan halus nih wali Nak ai. Bisa malihat urang halus. Jadi kanakan ni ada yang
sumangat kuat kada papa. Tapi amun dasar lamah buluan kada kawa nak ai. Jadi
urang nang kada tahan ya itu tadi, timbul awak panas kadada sababnya. Manangis
tangah malam. Awak lamas pina handak taguring itu lain pulang ngarannya, kapialu.
Mun kanakan wahini kada tahu pang nang kaya itu-itu. Urang bahari dipidarai ai.
Amun wahini panas awak ka duktur, ya kalo Nak."
"Inggih Ni ai. Mudahan lakas wigas."
***
Jam dinding suah ka angka dalapan. Hinpun berbunyi sing nyaringan. "Siapa tih
urang manalipun ka hape Abah, liati pang Mah." Ujar Abah Galuh nang asik mamutar
caramah guru Bait nang Tipi Banjar.
"Assalamu Alaikum, Mamakah?."
"Waalaikumussalam, iih ini Mama Mah. Dimana ikam, Nak. Ni Mama parak hudah
wadah ikam di Batulicin."
"Inggihkah, Mak? Bujurankah? Nah am, bakajutan nah kisahnya lih."
"Ni salajur manyalajur tempulu ada rumbungan pangajian ka ampah situ. Isuk ujar
ada Habib Umar tang Hadral Maut Makah kalo. Pas ai maelangi cucu Nda. Kaina
padahi lawan laki ikamlah. Ambili Mama ka Simpang Ampat, parak pulisi tuh lah. "
"Inggih, Mak ai. Kaina lun padahiakan lawan Abahnya manunggui pian ka Simpang
Ampat." Talipun ditutup sidin.
