Page 8 - kapidaraan canva book-el_Neat
P. 8
"Inggih Mak ai. Samalam ulun ka pahumaan handak maambil nyiur banar ai. Sakalinya
julak Udin mangiyau minta diganii mamasang sapanduk Habib Umar." Sahut Abah
Galuh maanyaki pandiran Mama.
"Lain kali Bah ai, hinpon ni nah jangan kada ingat dibawa. Ngalih banar mehubungi
pian mun sudah tatinggal nih." Ulun manggarunum rasa sangkal manahani.
Kangangalihan mahubungi laki amun hinpun kada tabawa.
"Istirahat dulu gin, Mak ai, lapah awak. Lun ulahakan teh satumat lih." Ulun bajauh ka
dapur malikit kumpur.
"Mama handak baisya dulu gin. Bisa ai kaina mama maambil saurang banyu panas.
Kada usah gin be teh-tehan Mah ai."
Galuh talihat taguring banar, sudah parak subuh kada sing bangunan.
"Alhamdulillahirobbil alamin." Sukur banar ulun dalam hati. Allah hudah manggarisakan
urang hidup nintu banyak cubaannya. Kita diwajibakan parcaya lawan parkara-
parkara gaib. Samuaan ampunNya. Lawan Allahlah sabarataan parkara
disarahakan.
Abah Galuh pina mangaruh banar sidin. Kauyuhan saku. Atang samalam bagawi ka
pahumaan. Imbah pang musim mananam banih. Pas harinya hujan nginih. Mudahan
wigas sabarataan bacari rajaki gasan anak bini.
"Bah, Bah, o Abahnya, bangunan gin, parak subuh nah. Babasuh muha ambil banyu
wudhu. Ka langgar. Mama pinanya mandi hudah. Kawani ai hidin salajur, kalo kaina
handak ka langgar jua."
