Page 70 - Балдарга 2023_Neat
P. 70
– О, улу нӧкӧрим, слердиҥ jакылта бӱтти. Борбыйакты таптым. Ак-
Кайаныҥ эдегинде, Ак-Сууныҥ jарадында боро тал агаштар ӧзӱп jаткан
эмтир. Ол талдар ӧзӧгинде, буурыл Буланныҥ мӱӱзинде, амыр-энчӱ jуртап
jаткан эмтир.
– Мен ого jедерим, угы-тӧзин jок эдерим – дейле, Jутпа-Jылан jол-
jорукка белетене берди.
Борбыйак Буланныҥ мӱӱзинде амыр jуртап jатты. Буланга да сӱрекей
jакшы болгон. Борбыйак тайганы эбиреде учуп, кайда аҥчылар jӱргенин
jетирип келзе, Булан ӧйинде jажынып калатан. Качан уйуктап, амырап
jатканда, Буланды томоноктор, чымылдар тӱйметпес болды.
Бир катап Булан уйуктап jадарда, Борбыйак «ш-ш-ш» деп шыркыраган
табыш угуп ийди.
– Ш-ш-ш, Борбыйак, менеҥ jажынып, кайда барарым деп бодогоҥ? Мен
сени кайдаҥ ла табарым – деп, Jутпа-Jылан ач оозын арбайта ачып алган
Буланга jууктап келеетти.
70
