Page 16 - bon-dia-aruba-20220521
P. 16
A16 SKINA DI MUCHA
Diasabra 21 Mei 2022
Tuma haci
Nos tabatin dos cacho crioyo, e macho tabata un cacho preto cu hopi lana y e
tabata yama Bobby y e hembra tabata un mix di boxer cu otro cacho di caya,
e tabata bruin oraño cu manchanan blanco y preto mescos cu un boxer y su
nomber tabata Daisy. Daisy tabata un cacho inteligente, di chikito nos a ripara
caba cu e tabata compronde cosnan mas liher banda di e otro cachonan.
E tabata kita clechinan di cabuya un pa e drumi ariba y e otro pa e tapa su curpa. Ora e
tabata carga cria den bariga e tabata drenta cas coy un peluche of popchi y ora nos a bay
mira kico e tabata haci cu e peluche, nos curazon tabata dirti, e tabata drumi cu e peluche
den su patanan dilanti y su cabes riba dje.
Daisy aparte di inteligente e tabata gusta tenta Bobby. Bobby tabata un cacho hopi trankil,
e tabata gusta dal su siesta tur merdia, Bobby si no tabata gusta hende, y tur ora nos
mester cer’e den su hoki ora nos haya bishita. Bobby tabata stima Daisy, e tabata yuda
Daisy cuida su puppies te hasta haci nan limpi oranan caba di hasi sushi (nos a dun’e e
nikname “Nana”).
Tambe pasobra e tabata wanta tur co’i sokete di Daisy. Un atardi banda di 4or mi mama a
prepara hotdog cu juice pa nos y a traha dos hotdog special, un pa Daisy y un pa Bobby.
Un cos di Bobby tabata cu e tabata gusta wak Daisy come prome pa despues e sinta
come esun di dje. Ora mi mama a pone e hotdognan den e baki, Daisy e biaha aki a haci
algo diferente, e no a bay come di biaha pero el a cana bay na e gate y cuminza blaf yen
di animo. Bobby tambe a hala di e tayo di cuminda pa wak ken tabata pafo y e tambe a
cuminza blaaf, pero en ta wak nada; ora el a bin back pa su tayo di cuminda, el a wak cu
su tayo tabata bashi.
Mientras Bobby tabata blaf, Daisy a come su hotdog y el a coy core sconde esun di
Bobby. Ata e pober Bobby a keda rondia su hotdog! M’a haya duele y m’a bay mustra
Bobby unda Daisy a sconde su cuminda, mientras Daisy tabata gaña drumi riba e banki
ta wak Bobby haci drama.
Bo tin un storia leuk of pret di bo mascota of otro animal cu kier comparti cu Bon Dia
Aruba? Por email bondia.aruba@gmail.com.
