Page 49 - MIN SOCIAL

Oficina di Ombudsman ta funciona independiente di
gobierno

Publication: Thursday, 21 May 2015. Categoria: General
Ombudsvrouw Alba Martijn di Curaçao:

ORANJESTAD(AAN): Alba Martijn ta e di dos ombudsman den historia di e servicio aki na Curaçao. Na luna di mei
2015, e servicio aki ta existi pa 12 aña y Martijn ta completando su periodo como ombudsman despues cu su
antecesor, Fred Wiel, tambe a mantene e funcion pa seis aña.
Como cu na Aruba a firma e concepto di ley pa institucion di un oficina di ombudsman diamars, a acerca Alba Martijn
pa comparti cu comunidad di Aruba informacion tocante e funcionamento di un ombudsman den su comunidad.
Asina pueblo di Aruba tambe ta haya un idea di e rol y importancia di tin un ombudsman na su disposicion.
Martijn ta splica cu den ley e posicion di ombudsman ta ancra y loke e oficina ta haci ta conduci investigacion basa
riba un keho cu e ta ricibi for di un of mas ciudadano cu no ta contento cu un comportacion di parti di gobierno. E
oficina tambe por, riba su propio iniciativa cuminsa un investigacion despues cu e constata un situacion irregular pa
cu comportacion di gobierno. E meta final ta pa haya un solucion satisfactorio pa e ciudadano(nan).
E oficina di ombudsman a tin su luga den comunidad di Curaçao y gran parti di e pueblo sa unda e ta y kico e
servicio cu nan ta brinda ta encera; rond mundo e servicio di ombudsman ta uno gratis, Alba Martijn a bisa.
El a splica cu tin un procedura pa tur keho y su investigacion. E proceso ta cuminsa cu un ciudadano cu ta acerca e
ombudsman, unda cu e mester bin cu su documentonan of e ombudsman mes ta busca e papelnan necesario den e
sistema di registracion di documento di gobierno.
E prome paso ta “intermediacion”, unda cu ombudsman ta trata di haya e dos partidonan pa yega na otro. Si esaki
no duna resultado, e ombudsman ta cuminsa cu “intervencion” y ta purba pa hunto cu e servicio di gobierno yega na
un solucion pa e keho di e ciudadano, naturalmente denter di un periodo rasonabel.
Alba Martijn a splica cu si no por yega un solucion asina tampoco, e ombudsman ta acerca por escrito e minister
(bestuursorgaan) bao kende e servicio ta resorta como un di tres intent pa yega na un solucion. Si acaso gobierno
tarda cu un contesta, ombudsman ta organiza un “hoorzitting”, cual ta un sesion unda ta trece hunto e
representantenan di e ministerio y e ciudadano. E ombudsman ta e “voorzitter” di e sesion.
Alba Martijn a splica cu e ultimo paso, si ainda despues di e hoorzitting no bin un solucion, ta pa traha un raport cu
ta worde publica unda cu e ombudsman ta informa comunidad di e caso, e investigacion y si gobierno ta corecto of
no. Asina comunidad tambe ta worde informa di casonan unda un servicio di gobierno a faya y kico nan a recomenda
gobierno pa asina corigi e fayo aki.
E meta ta pa e ciudadano(nan) haya oido y un solucion satisfactorio pa su keho.

http://www.diario.aw/2015/05/oficina-di-ombudsman-ta-funciona-independiente-di-gobierno/