Page 52 - TTC 9 JULY 2015
P. 52
Cuminsando cu area di Surfside
Publication: Thursday, 9 July 2015. Categoria: General
Minister Otmar Oduber: Fondonan di TPEF pa proyecto pa limpiesa di beachnan
ORANJESTAD (AAN): Den e proximo simannan, cu fondonan di Tourism Product
Enhancement Fund (TPEF) ta cuminsa e prome parti di e proyecto pa upgrading di nos beachnan
cu e limpiesa di e subsuelo di lama entre Surfside y e area dilanti di e ex-cas di gobernador riba
L.G. Smith Boulevard. Minister Otmar Oduber a elabora den un entrevista tocante e prome fase
di e proyecto importante aki cu lo tin un duracion di entre tres pa cuater luna y lo costa mas of
menos 700 mil Florin. E proyecto completo lo dura dos aña y ta presupuesta pa costa entre tres
pa cinco miyon Florin.
E titular di turismo a splica cu a papia pa hopi aña tocante e calidad di e beachnan di Aruba cu a
bay atras na hopi parti di nos isla, referiendo tanto na e area pafo di lama, como e parti di
subsuelo di lama. For di desde cu e tabata miembro di parlamento den oposicion, esaki tabata un
topico cu tabata riba mesa, cu discusionnan tocante e calidad di subsuelo, cu na cierto area tin
hopi piedra, tin hopi lodo y hasta lodo cu den diferente epoca di aña ta saca un holo stinki ora cu
trapa den dje.
Pa hopi aña no a atende cu e asunto aki, cu ta un proyecto costoso, pasobra mester saca e tera y
sea ta hacie limpi y uz’e di nobo of mester tir’e den buraconan mas hundo den lama, e
mandatario a bisa.
Tin tres area di atencion cu ta worde atendi cun’e actualmente y e limpiesa di e subsuelo di lama
y e beachnan mes ta un di nan. Un di e otro proyectonan ta parti di e infrastructura nobo cu ta
creando na diferente beach, cu bañonan y kiosconan cu diferente servicio pa acomoda e
turistanan cu ta bin cu barco crucero den un otro area cu no ta dilanti di e hotelnan pa alivia e
situacion dilanti di e hotelnan.
E otro proyecto ta e “Beach Policy” cu ta yegando na su etapa di ehecucion. Tin casi dos aña
hibando combersacionnan cu tur compania di watersport y e hotelnan ubica na beach y awo a
yega e momento pa cuminsa implementa e coordinacion y regulacion di tur actividad cu ta tuma
luga na beach.
