Page 60 - MIN ECEM

Un aerolinea so ta bulando for di Aruba y tin plan pa expande

Wednesday, 05 July 2017 19:46
1

Comparti

Nos a combersa cu sr. Edwin Kelly, director di Aviacion Civil, riba e interes di mas aerolinea local.
Pasobra nos ta depende di un aerolinea cu probablemente no ta 100% local.

El a splica cu na Aruba tur aerolinea mester cumpli cu cierto leynan, rekisitonan pa bin na remarca pa
cuminsa. Tur aerolinea cu tin awor aki ta aerolineanan local. Tin un so, cu ta haciendo vuelo y nan tin
plannan pa expande. Awor aki ta bezig ta evaluando kico ta bay haci. Tin diferente otro partidonan
interesa y ta bezig ta wak e beleid con ta bay tuma nan, cuanto ta bay tuma y den ki secuencia. Tambe
dependiendo di e necesidad nacional cu tin por ehempel e prioridad awor aki, ta interisland. Awor aki ta
spera den temporada corto, toch por tin bon noticia tocante di esey.
Cuanto por dura pa bon noticia

Segun Kelly ta dificil pa bisa pasobra no ta den man di Aviacion Civil. Ta papiando aki di temporada
basta cortico cu por tin mas competencia riba e ruta. Esey ta importante. Mas aerolinea tin, por tin mas
competencia, prijs ta bay mas abao, servicio ta bira miho y esey ta loke Aviacion Civil ta stimula pa
sosode.

Keho

Kelly a sigui splica cu a anuncia den pasado y ta bezig cu un ley cu ta na Directie Wetgeving awor aki pa
proteha e interes di e pasahero y tambe di un otro banda, ta purba di stimula transporte riba e liña,
vooral Aruba-Corsou, Aruba Boneiro, pa tin mas competencia. Obviamente ta un liña hopi fragil, pasobra
bo no por tin 10 aerolinea tampoco riba e ruta, pasobra un ta mata otro y ta haya e mesun problema bek.
Ta algo cu ta bezig ta wak den e maneho hopi cauteloso, pa por tin un maneho coherente cu di un banda
ta sigura cu tin competencia, cu tin mas cu un aerolinea ta bula. Pero di un otro banda ta proteha e ruta
tambe pa no tin dimas aerolinea ta bula cu despues un ta mata otro.

Exigencianan

Kelly a splica cu diferente reunion a tuma luga y awor aki nan ta tiki mas streng tambe, den kende nan ta
admiti y kende nan ta duna e AOC. Tambe pa evita cu despues ta bay tin diferente compania cu bo por ta
sigur riba termino corto, pero no riba termino largo. Ta prefera pa tin algun compania, pero cu despues
riba termino largo ta stabil y cu tin companianan fuerte caminda cu orguyo ta carga e nomber di Aruba
tambe internacionalmente. Exigencianan tabata tin hopi. Tanto riba nivel financiero, riba nivel
economico, pero tambe riba nivel operacional tecnico, cu tin cu cumpli cun’e. Awor ta mas streng riba
prescreening tambe. Prome cu bay den e proceso pa laga un grupo aplica, cu ta haci un sorto di
prescreening pa wak tambe cu en berdad e personanan ta serio, nan tin placa en berdad y cu nan ta
dispuesto pa lanta un aerolinea cu ta serio tambe.