Page 13 - ATA front covers-14_Neat

Aruba certification program su ‘summer ’s cool’ un exito
rotundo

Tuesday, 18 July 2017 18:16
1

Comparti

Diabierna ultimo, cu musica y animacion, Cas di Cultura tabata e sitio pa hobennan y nan mayornan pa
un celebracion special. Cu mas cu 3.300 persona certifica, e programa ‘Aruba Certification Program’
(ACP) a conclui su prome ‘Summer ’s Cool’ summer camp cu a informa y inspira mas di 35 mucha entre
edad di 10 cu 14 aña cu e maraviyanan di Aruba.

Aki a busca pa inspira y duna un sinti di orguyo entre e hobennan bibando riba nos isla. Tambe a brinda
un enfoke adicional riba turismo, su importancia y pakico nos mester mantene e orguyo aki mientras nos
ta den contacto cu nos bishitantenan. Durante e programa vacacional aki, e participantenan a siña di nos
simbolonan di Aruba manera su escudo, himno y bandera, pero tambe nos fiestanan nacional. Atraves di
bishita na museo y charla a conoce e historia di nos isla, por ehempel ken tabata e prome habitantenan,
con e industria a desaroya den tempo, su efecto riba nos comunidad y cua ta nos cuminda y bailenan
tradicional. Pa loke ta trata turismo, e participantenan di ‘Summer ’s Cool’ a siña con esaki a cuminsa na
Aruba, e perfil di nos bishitantenan, e vision general di turismo y e papel cu Aruba Tourism Authority y
Aruba Hotel And Tourism Association (AHATA) ta hunga den esaki. Tambe nan por a wak di serca con e
ta pa traha den e industria turistico. A splica kico ta excelencia den servicio, kico ta hospitalidad y e
importancia pa tin e actitud corecto y cordial.

Ademas a toca e tema di sostenibilidad, papiando di e nificacion, nos retonan actual y areanan protegi. “E
‘Summer ‘s School Camp’ tabata un evento sumamente diverso y exitoso na unda e muchanan tabata
hopi entusiasma pa participa. Manera e dianan tabata progresando por a nota cu e muchanan tabata mas
inspira y orguyoso di ta biba riba Aruba, logrando e meta principal di e programa,” Sra. Indra Zaandam,
directora di ACP a expresa durante e ceremonia di certificacion di e hobennan. E idea ta pa logra
resultadonan riba termino largo y un continuacion di e ‘compromiso’ cerca e futuro trahadornan di nos
industria turistico. Elementonan principal di e programa regular di ACP ta ahusta den un programa
adapta pa e hobennan, cu aspecto di conocemento y servicio presenta den sesionnan y paseonan. ‘Aruba
Certification Program’ (ACP) ta un programa dirigi pa Aruba Tourism Authority cu e mision cu atravez di
educacion, preserva y mehora Aruba su calidad di servicio y amabilidad cu tanto nos Aruba ta conoci p’e.
Aruba Certification Program lo continua despues di vakantie grandi y ta dirigi na certificacion di
adultonan cu ta traha directamente y indirectamente den e industria turistico.