Page 33 - Min On, 12 May 2015

Tambe ta asina cu instalacion di e comision y nan trabou, na ningun momento ta atacha e
docente directamente. Aparte di esey, e comision a haya un tarea amplio pa cumpli cune, den
cuadro di duna conseho y recomendacionnan na e mandatario riba con pa sigura cu tur alumno y
docente ta debidamente protegi y cu tin protocolnan na nan luga den con ta anda cu kehonan cu
drenta na scolnan publico.

Hues a declara na final cu no por apela e decision aki den Corte di Ambtenaarnan. E caso aki
sinembargo ta para los di e otro casonan cu Juffrouw Suki Croes a entama contra Gobierno, via
su abogado mr. Hendrik Croes. E otro casonan aki lo mester bini dilanti Hues ainda pa
tratamento y sentencia.

Mientrastanto e comision a sigui haci nan trabou mientras cu Departamento di Inspeccion di
Enseñansa a scucha e varios docentenan, mayornan y alumno envolvi pa e investigacion
andando. Nan tambe lo mester presenta recomendacion na Gobierno di con pa sigui anda cu e
caso specifico aki, cu si Juffrouw Suki Croes ta apto pa sigui duna les su so of mester di duna les
bou guia y supervision di un otro docente, si e por sigui duna les den klas 6 y si e mester haya
mas guia den su forma di duna les na alumnonan. Aunke cu e alumno mes no a haci nada den e
caso aki, a sak’e for di su klas y hink’e den un otro klas 6 na e mesun scol pa e por caba e aña
escolar aki. Pues, un diferencia di opinion entre tata y docente, a conduci cu e alumno awor a sali
perhudica. Esaki tabata locual kier a evita na un principio, pero ta parce cu den henter a
trayectorio a tene mas cuenta cu derecho y interes di docente en bes di interes di e alumno mes!

http://www.diario.aw/2015/05/abogado-hendrik-croes-a-perde-caso-den-corte-pa-juffrouw-suki-croes/