Page 34 - Min On, 12 May 2015

Discusion den partido a dura mas cu debate den Parlamento

Publication: Tuesday, 12 May 2015. Categoria: General

ORANJESTAD (AAN): E reunion cu tabata originalmente planea pa cuminsa dialuna mainta
9’or a cuminsa 6 ora despues di su ora planea original. E Parlamentarionan di AVP tabatin
mester di bastante tempo pa discuti asuntonan interno, manera e forma cu ta cumpli cu e carta di
CFT di 29 di december 2014, consecuencia di e acuerdo cera cu Hulanda y e intencion di por lo
menos un Parlamentario pa subi porcentahe di BAZV den e cuadro aki.

Den e ultimo fase di tratamento di presupuesto, ta toca turno na Prome Minister Mike Eman y
Minister di Finanzas Angel Bermudez pa duna cuenta riba e maneho cu nan kier hiba den e aña
cu ta transcuriendo.

Di parti di Parlamento e debate a concentra su mes riba un defensa di parti di coalicion di e
maneho cu a wordo hiba. Di parti di oposicion a ataca e maneho cu a wordo hiba como tambe e
consecuencia den forma di e protocol cu Minister Eman y Bermudez a cera cu Minister Plasterk
y Dijsselbloem.

Poco ta e Parlamentarionan cu a papia di e retonan actual y con ta atende cu nan. Te awor e
amienda tan spera pa aumento di BAZV no a wordo entrega tampoco. No ta conoci si esaki ta
significa cu e no lo wordo entrega mas den e reunion aki of cu e lo wordo trata den segunda
tanda di e presupuesto.

Locual si ta conoci ta cu e tension entre Parlamento, Gobierno y Reino ta keda presente.
Diaranson awor Aruba su finanzas lo ta un biaha mas riba agenda di Conseho di Minister di
Reino. Locual wordo dicidi diamars den Parlamento por ta crucial pa e actitud di e Hulandesnan.

http://www.diario.aw/2015/05/discusion-den-partido-a-dura-mas-cu-debate-den-parlamento/