Page 74 - KPA - JUNI 8,2015

Ex Polis cu a secuestra su propio yiu muher y bay biba
Hulanda cune a presenta dilanti di huez

Publication: Monday, 8 June 2015. Categoria: Judicial

ORANJESTAD (AAN): Recientemente e sospechoso S.D.M.R naci na Corsow y bibando na
Aruba a presenta na corte di husticia, debi na e hecho cu el a wordo acusa di den e periodo di 5
di April 2013 na Aruba, Curacao of Hulanda, conhuntamente cu un otro of otronan, a
intencionalmente kita un mucha bao 12 aña di edad for di bao di e persona cu tin autoridad legal
riba dje, dor di a tene na algun lugar na Curacao y siguientemente na algun lugar na Hulanda of
Europa.

Banda di esaki el a wordo acusa di den e periodo di 5 di April 2013 na Aruba, Curacao of
Hulanda, o sea Europa of mundo, a intencionalmente sconde e mucha en cuestion, cu a wordo
kita for di bao di e persona cu tin autoridad legal riba dje, pa husticia y polis no haye, dor di,
conhuntamente cu un otro of otronan, pone e mucha na adresnan desconoci pafor di Aruba.

Ta trata di su propio yiu muher kende e tempo ey tabata tin 4 aña y mey.

Despues cu S.R a divorcia di su casa na September 2012, nan a yega na un areglo, unda cu e
mucha lo keda cerca e tata, pero e mama tabata tin derecho tambe di busca e mucha pa keda cune
algun dia pa siman. Ambos a keda cu e derecho di ‘voogd’ riba e mucha.

Na April S.R a bisa su ex casa cu e ta bayendo cu e mucha algun dia pa Corsow, pa wak su
famia.

E muher a bay di acuerdo y el a firma e documentonan necesario pa esaki tuma lugar.

E homber a bay Corsow cu e mucha riba 5 di April y e mama di e mucha despues a reclame cu e
no a ni trece e mucha cerca dje prome cu nan a bula, pa bisa ayo.

S.R algun tempo prome ya a tuma su retiro como agente policial y un di su coleganan despues a
mustra cu el a haya un whatsapp for di S.R kende a bisa: “Lantando buelo awor cu mi yiu…te
nunca mas”.

E muher no tabata sa cu S.R a tuma su retiro y a bende su pertenencianan pa e bay for di Aruba
pa semper.

Atravez di emails e muher Colombiano tabata tin contacto cu S.R, kende a crea e impresion cu e
lo bin bek. Ora cu e no a bin bek riba e dia cu e muher a pensa, el a bay na e cas y el a wak cu
mayoria di e pertenencianan di e homber no tabata tey mas.

El a wak tambe cu auto di S.R tabata na venta y el a cuminza sospecha lo peor.