Page 34 - flip

Den shock cu loke ta pasando cu e hobennan den Aruba
Booth Camp

Publication: Tuesday, 9 June 2015. Categoria: General

Sra. Astrid Vries, un di e fundadornan

ORANJESTAD (AAN) E hecho cu shete (7) hoben siman pasa a huy for di un booth camp cu ta
un iniciativa priva, a hala atencion di hopi hende. E instancianan concerni, entre otro Minister
encarga cu asuntonan di Hubentud Paul Croes tambe a bisa di ta investigando e situacion,
principalmente e trato di e lider cu ta guia e hobennan.

Un di e personanan cu tabata na cuna di e proyecto di Aruba Booth Camp y tabata forma parti di
e prome directiva ta sra. Astrid Vries. E idea tras di e Aruba Booth Camp tabata pa duna un man
na hobennan cu a perde direccion den bida. Ademas di fundador, e tabata Groep Commisaris.

Awe, segun sra. Vries ta bisa, loke ta pasando den Aruba Booth Camp ta un shock p’e como
tambe tur esnan di Aruba y di exterior cu tabata sigui nan trabou via di entre otro Facebook.
“Pami, como fundador, loke ta pasando aworaki ta tristo. E Aruba Booth Camp a wordo lanta
basa riba mi vision y di esun di sr. Webb. Mi a traha asina duro, pero den apenas 4 luna mi
mester a tuma e decision di bandona e proyecto, mi vision y laga tur trabou haci un banda.”

El a splica cu Aruba Booth Camp a wordo lanta cu e meta pa yuda hobennan. Esey tabata su
idea. Despues el a topa cu sr. Webb kende tambe kier a colabora den e proyecto y a bisa cu e ta
bay hacie algo oficial na Notario, hunto cu otro persona. Despues di a scucha cu nan vision ta
similar, inclusive e ayudo den e barionan, el a dicidi di duna un man na e hoben aki den su
proyecto.

E fundacion ta consisti di un directiva cu ta consisti di su persona, su mayornan, y sra. Vries mes.
Na 2012 ya caba supuestamente e tabatin algo similar, y su mayornan a sostene den esaki. Pesey
el a nombra su mes director y su mayornan despues di dje.

Dia 10 di mei ultimo el a dicidi di bandona e Aruba Booth Camp. El a dicidi di bandona esaki
despues di diferente diferencia di opinion cu a surgi riba cosnan cu e hoben Webb tabata haci.
EL a sinti un actitud dictatorial cerca Webb. EL a yega di hala su atencion riba algun aspecto,
manera ordena e muchanan traha juice p’e pero e hobennan mes ta haya awa. El a sinti cierto
miedo cu e hobennan tabata sinti pa Webb kende nan tabata yama Commandante. Hasta tabatin
un situacion cu el a yega y topa cu e muchanan tabata hunta gel den su cabey, algo cu sra. Vries
ta bisa cu Webb mes por haci pa su mes.