Page 20 - Minister Arthur Dowers
P. 20
AWEMainta Diamars, 16 Februari 2016 25
MEP celebrando 45 aña
“MEP a wordo funda,
pasobra Betico Croes no
por a bira lider di AVP”
Di acuerdo cu Evelyn Wever-Croes
PARTIDO Movimiento Electoral di Pueblo MEP ta celebrando 45 aña di
fundacion di partido MEP.
Tur cos a cuminsa ora despues di morto di Shon A Eman den aña 1967, lider di
partido AVP. Betico Croes, un politico hoben y hopi popular riba lista di AVP,
tabata gosa di simpatia di gran mayoria di e partido y pesey lidernan di bario di
AVP a eligi Betico como lider di AVP dia 24 di januari 1971.
Sinembargo directiva di AVP cu Sieg Eman na cabes, tabata contra, y a entama
un caso den Corte contra Betico Croes y Benito Giel pa declara e eleccion di
lidernan di bario di AVP nulo.
Den Corte, Huez Frankel a puntra Sieg Eman dicon mester declara e eleccion di
lidernan di bario nulo, y Sieg Eman a contesta e palabranan legendario: Pasobra
Betico su fam no ta Eman, solamente un persona di fam Eman por bira lider di
AVP.
No a keda e lidernan di Bario e ora nada otro cu sigi Betico den su partido nobo,
y riba 9 di februari 1971, durante un reunion cu centenares di lider di bario di
AVP na cas di Betico na Cumana 84, nan a declara kiebro cu AVP y a vota pa
funda un partido nobo, Movimiento Electoral di Pueblo MEP. Fundacion di
partido MEP a tuma lugar dia 14 di februari 1971 na notario.
E diferencia grandi cu Betico a enfoca riba dje ta pa uni e pueblo, pa crea mas
union, y caba cu e segregacion cu partido AVP tabata para p’e.
Betico a uni e pueblo p’asina realisa e soño di nos
pueblo, di sali di e constelacion Antiyano. Y ta
danki n’e union aki, y e determinacion di Betico pa
cumpli cu e deseo di nos pueblo, e aña aki nos pais
ta celebra 30 aña di nos Status Aparte.
Partido MEP den su trayectoria a logra hopi cos bon
pa Aruba, proyectonan di cas di pueblo, scolnan,
aeropuerto, waf.
Partido MEP t’e unico partido grandi den Reino
cu a cuminsa cu 7 asiento, y nunca a baha bou di
7 asiento. Demas partidonan tur a baha bou di
esey, manera partido AVP cu un tempo a yega na
1 asiento.
Partido MEP lo celebra e 45 aña durante henter e
aña aki, cu diferente actividad, especialmente di
concientisacion y educacion.
“Nos ta trahando tambe riba un publicacion y un
website, pa documenta e historia y logronan grandi
di partido MEP, desde su fundacion te awor.
Partido MEP ta un partido di pueblo y pa pueblo, y
nos lo sigi lucha p’e bienestar di nos pueblo, den tur
e añanan nos dilanti”, lider di MEP Evelyn Wever-
Croes a duna di conoce.
