Page 160 - SAIL ARUBA 2015 & Royal Visit

Picton Castle: Velero clasico cu un tinte Arubano

Tuesday, 28 April 2015 21:16

E lo ta un bista special ora cu e velero Picton Castle cu velanan bol aparece dilanti costa di Aruba. E nave
aki lo ta di bishita na e isla den cuadro di Sail Aruba 2015. Capitan di Picton Castle ta Daniel Moreland,
naci na Aruba.
Picton Castle a wordo construi na 1928 como un trawler motorisa pa pesca. E mesun compania a laga
construi 4 mas y pa hopi aña nan a wordo uza pa pesca den e lamanan rond di nan base na Wales. E
barconan tabata wordo considera, pa e tempo ey, barconan moderno, cu aparatonan di iluminacion di
coriente y aparato pa midi profundidad. Picton Castle a wordo yama asina na honor di un kasteel na
Wales cu ta data di siglo 11.
Na inicio di Segunda Guera Mundial Picton Castle a wordo uza door di Marina Britanico y tabata sirbi pa
deshaci di bomnan. E nave a sobrevivi guera, aunke di suerte. Un dia un bom a explota net dilanti di e
barco, cu a wordo lanta door di e olanan a causa di e impacto di e explosion. Sorpresivamente, el a sufri
masha poco daño y Picton Castle por a sigui normal cu su trabou.
Riba e dia cu e Alemannan a dicidi di renuncia Noruega, Picton Castle a drenta haf di Bergen, debi na un
problema tecnico serio. For di e tempo ey, e nave tabata conoci cerca e pueblo Noruego como e
“Libertador di Noruegonan”.
Despues di guera, Picton Castle a wordo uza como barco di carga y pa decadanan largo a transporta tur
tipo di mercancia entre e paisnan rond di Noordzee y estadonanan Baltico. E tempo ey el a carga e
nomber di Dolmar.
Na 1992 Capitan Moreland a bini den bista. E tabata en busca di un barco cu por wordo reconstrui den
un velero clasico. Den fjorden di Noruega el a bin topa cu DOLMAR y a cumpre. Hunto cu un tripulacion
chikito el a prepara e barco pa e biahe den Lama Atlantico y a yega New York. Eynan e barco, cu a haya e
nomber bek di Picton Castle, a haya un luga na haf di South Street Seaport Museum. Na 1996 Picton
Castle a bay di biahe pa Lunenburg na Nova Scotia, Canada, unda cu el a pasa den trabounan di
reconstruccion cu a costa 2 miyon dollar pa e bira un”driemaster”.
Picton Castle ta un velero di 179 pia largo, ta pisa 300 ton, y tin 12.500 m2 di bela. Ora cu e tripulantenan
ta trahando den e mastnan, tin biaha nan ta colga na un altura di mas cu dies piso halto riba e dek. Nan
ta logra separa mas di 175 linea for di otro, hasta den scuridad. E nave ta wordo uza como un barco di
training, unda cu e hendenan por siña e detayenan mas chikito di veleronan clasico.
Na 1998 Picton Castle tabata e “flagship” pa e Aña di Oceano di UNESCO y a biaha rond mundo. Den
Oceano Pacifico el a reparti materialnan di scol. Despues a realisa mas biahe cu metanan humanitario y
di durabilidad. “Durabilidad di mes bo ta siña abordo di nos barco,” segun capitan Moreland den un
entrevista cu e revista ExeQ. “Esnan cu ta nabega cu nos, no solamente ta siña encuanto nave, pero
tambe e disciplina propio y realidad di ser humano. E luho mas grandi abordo ta e naturalesa rond di
nos. E aprecio pa esaki nunca bo ta perde.”
Moreland tin mas cu trinta aña di experencia riba veleronan grandi y ta un di e autoridadnan mas respeta
riba tereno di veleronan tradicional riba lama.

http://www.24ora.com/local-mainmenu-5/94609-picton-castle-velero-clasico-cu-un-tinte-
arubano