Page 75 - MIN TTC - JUNI 17 2015

No kier sobrepasa e 30% di hotelnan all inclusive na Aruba

Publication: Wednesday, 17 June 2015. Categoria: General
Jennifer Reyes di Comision di Turismo:

ORANJESTAD (AAN): Parlamentario Jennifer Reyes, president di e Comision Fiho di
Parlamento di Turismo, a yama un reunion cu stakeholdernan pa trata specificamente e tema di
all inclusive cu ta un preocupacion cerca pueblo di Aruba y Gobierno.
Señora Reyes a splica cu pa algun siman caba nan a bin ta siguiendo e trend den negociacionnan
andando pa un hotel, cu a worde menciona cu lo bira all inclusive. A constata cu nan tabatin hopi
pregunta riba e tereno aki pa cual e comision a dicidi di yama un reunion cu e Minister di
Turismo Otmar Oduber, y otro instancianan concerni.
El a recorda cu ya durante tratamento di presupeusto, e fraccion a expresa su preocupacion riba e
tema aki y a presenta un mocion cu e deseo pa regula hotelnan all inclusive di un miho forma.
Despues di e periodo ey, e tema di all inclusive a bolbe lanta cabes pa cual a yama e reunion,
combina cu e comision di Finanza y Economia.
E mandatario encarga cu Turismo a trece un relato hopi amplio dilanti unda a splica e desaroyo
di turismo na Aruba, e entrada di all inclusive, e situacion actual, y kico tin pensa pa haci riba e
situacion aki di parti di Gobierno. “Nos a haya un handout unda nos por a haya un concepto di un
ley pa regulacion di vergunning pa hotelnan na Aruba. Diferente miembro a haci pregunta y a
duna algun sugerencia.” E Minister a splica cu tin urgencia grandi pa e adaptacion di e ley aki
worde trata mas lihe posibel den Parlamento pa “salvaguardia e vision cu nos tin pa cu turismo”.
Den Caribe henter tin un trend di all inclusive, pues no ta algo cu ta sosode na Aruba so. Pero
kier pa e parti di Aruba ta mas minimo posibel. Na Aruba tin mas o menos 30% di all inclusive y
kier lague te aki tambe, mirando cu e isla ta chikito y cual hustamente ta permiti pa regule di un
miho forma posibel.
http://www.diario.aw/2015/06/no-kier-sobrepasa-e-30-di-hotelnan-all-inclusive-na-aruba/