Page 3 - Binder1

Cristo Redentor, Niagara Falls, Empire State Building, Sydney Opera House ta djis algun di tur e famoso
icono nan cu lo para den scuridad pa un ora of mas largo cu un muestra di poder cu nos ta comprometi
pa tuma rienda di e cambio climatico global.

Earth Hour 2015 lo ta mas grandi aun. Pa haja un idea di con grandi e actividad aki ta, please tuma un
momento pa wak e Earth Hour 2015 video ariba www.youtube.com/earthhour

Nos ta spera cu e comunidad di Aruba uni cu nos den e meta aki door di paga nan lusnan di cas y
establecimientonan y tambe stimula bisiña- y amigonan pa haci mescos durante e ora stipula, esta 28 di
maart di 8.30pm pa 9.30pm. Tambe e pueblo di Aruba ta keda invita pa asisti na un ceremonia chikito di
paga lusnan di Willem III Toren na Oranjestad pa 8:30pm di anochi. E ceremonia oficial na Fort Zoutman
lo contene varios actividad, e.o. lo tin musica di grupo Melodia, lo coloca e belanan na e logo di EH2015
y tambe lo duna reconocimento na tres instancia local cu pa varios aña ta trahando na bienestar di e flora
y fauna di Aruba. Pa e aña aki nos lo duna reconocimento na Turtuga Aruba, Animal Rights Aruba y
tambe na Dr. Ricardo Gogorza.

Pa e aña 2015, nos ta desea pa mas skol participa cu Earth Hour. Ya pa algun aña caba tin varios skol
cu ta participa na EH pa medio di paga lusnan y airco den klas pa un ora of mas riba e diabierna prome
cu e dia oficial di Earth Hour. Pa aña 2014 nos a haja informacion cu alrededor di 17 skol a participa. Pa
e aña aki nos ta desea di kibra e record di cantidad di skolnan participando na e evento simbolico aki, y
pa medio di esaki nos ta desea di haci peticion na skolnan na Aruba pa uni cu e causa y pa tene un
evento di EH riba diabierna 27 di maart, te asina lew cu e rooster di skol ta permiti.

Tambe pa e aña 2015 nos lo tene un competencia di fotografia combina cu Earth Hour. Ta conoci cu
durante e evento mundial di Earth Hour hopi persona ta saca potret y upload esakinan pa mustra nan
sosten. Den pasado tabata tin varios foto di Aruba relaciona cu Earth Hour a bai ‘viral’ riba e Facebook
page y website di Earth Hour Global. Entre otro e potretnan di Fort Zoutman, di RIU Hotel, di Watertoren
San Nicolas y tambe varios otro a bira famoso riba rednan social mundialmente. Pa e aña aki nos kier a
tene un competencia di fotografia pa e comunidad di Aruba cu ta participa na Earth Hour. E criteria pa
participa ta simple: saca un potret creativo cu ta simbolisa Earth Hour y tag nos riba nos Facebook page
Earth Hour Aruba Community Group https://www.facebook.com/arubaearthhour
Of tambe por manda esaki na nos email: earthhouraruba@gmail.com
E persona cu saca e foto di mas creativo lo gana un premio atractivo.

E compromiso cu Earth Hour ta facilita nos tur na Aruba pa no solamente expresa nos preocupacion pa
nos salud y nos medio ambiente, pero tambe pa mustra tur hende rond di mundo cu nos tambe ta para
hunto pa busca solucionnan pa e retonan cu nos medio ambiente ta enfrentado y pa celebra lo unico cu
nos tur tin en comun, cual ta e planeta.

Bishita e website: www.earthhour.org pa mas informacion.