Page 70 - VOS DEC 12

Christian Garcia di SVB: Mas empleado y compania a bin
sigura nan mes na SVB

Sunday, 11 December 2016 12:21
Comparti

Christian Garcia ta funcionario di Riesgo di SVB y el a splica di e cifra y tambe e tipo di e cambionan cu tin. El a sigui
comenta cu como cu comunidad conoce tambe, a ser introduci cierto cambionan den e ley di seguro di malesa. E
cambionan aki a wordo anuncia den luna di April, na momento cu minister a aproba e ley. Esaki a drenta na vigor
tambe desde dia 1 di Juli, hunto cu e introduccion di e aumento di e premieloongrens.

Esaki a trece cu mas empleado a bin sigura nan mes na SVB y tambe companianan. Por mira tambe e efecto di esaki,
cu ta mira un aumento compara cu 2015. Di 918 empleado cu a bin sigura na 2015, a mira e aña aki un total di 2565
empleado a bin registra na SVB. Por mira un aumento bastante halto y tambe a mira un aumento den loke ta
instruccion di e companianan. Na 2015 ta un total di 108 compania a bin registra y pa transcurso di aña aki ya caba
tin un total di 220 compania registra nobo.

Na momento cu e ley a drenta na vigor tambe, a haya un grupo cu a bin acerca. Esaki ta door di e aumento den e
premieloongrens. Tabata un total di 2866 empleado cu ya tabata sigura na SVB pa seguro di accidente, pero cu a bay
over di biaha tambe pa e seguro di malesa, door di e aumento di premie loongrens. Di e grupo aki por a constata cu
den transcurso di e ultimo cinco lunanan, un total di 445 trahado a notifica AO cual a aumenta tambe loke ta e
beneficio di pagonan di AO cu SVB tin.

No solamente tabata tin aumento den loke ta e pagonan di e dianan di AO, pero tambe tabata tin aumento den loke
ta e total di cobransanan cu a manda extra na trahadonan. Tabata un total di 2.4 miyon florin, ta e balor di e
cobransanan cu a manda di cual te cu awo e tabata un costo di 1.5 miyon pa SVB. Ta trece un total di un beneficio
neto di 0.9 miyon pa e fondo di seguro di malesa.

Fuera di e cambionan cu tabata tin den ley, director Jacobs a comenta riba e intercambio di informacion cu Dimas.
Esaki tabata un intercambio cu a cuminsa den luna di Maart. Esaki ta encera cu Dimas ta solicita informacion di SVB
di personanan cu ta dispone di permiso di trabao y nan ta haci esaki pa confirma si nan ta sigura na SVB of no.

Den e ultimo lunanan, desde cu a cuminsa cu e intercambio di informacion, Dimas a solicita un total di 2500 trahado
di cual por a constata cu te cu awor, 23% no tabata registra na SVB. Esaki ta mustra cu ta un suma basta halto,
mirando cu ta un total di mas of menos casi 600 trahado cu no tabata registra na SVB, pero cu si tabata dispone di
un permiso di trabao.

E ta mustra e ora cu e cambionan den ley y e intercambio di informacion hunto cu Dimas ta dunando un fortalesa
hopi mas fuerte pa por tin un control loke ta inscripcion di trahado y tambe di companianan na SVB, segun Garcia.