Page 77 - VOS DEC 12

Edwin Jacobs di SVB: 2016 tabata un aña positivo cu yen
di desaroyonan grandi

Sunday, 11 December 2016 12:24
Comparti

Si nos mira y evalua 2016, tin cu bisa cu 2016 ta un aña transcendental pa SVB, segun director di SVB, Edwin Jacobs.
Transcendental primeramente un proceso di saneamento den e ultimo fondo den problema, a cuminsa aña pasa, a
culmina den parlamento di Aruba, a aproba e ley pa cuminsa cu e saneamento di e fondo aki pa un periodo di cinco
aña.

E saneamento riba su mes tabata un trayecto largo. Gobierno a duna e tarea pa busca un solucion cu un impacto
minimo. A presenta diferente scenario. Gobierno a scoge un prome impacto cu ta kere cu lo produci e efecto
necesario. Importante tabata cu den e proceso pa yega na e cambio di ley aki, Parlamento di Aruba a otorga SVB un
instrumento hopi importante y kisas ya mester a haya esaki na 1966, ora cu a introduci e ley di seguro di malesa na
Aruba, e tempo ey den Antias Hulandes. Cu ta un instrumento di un boet administrativo. Awor aki, desde 1 di Juli,
SVB ta dispone di un instrumento legal pa sanciona doñonan di trabao y trahadonan cu no ta cumpli cu e obligacion
di percura pa e trahado ta sigura, cubri pa e seguro social di SVB. Cu e instrumento aki por mira tambe cu e tin un
efecto grandi den trahadonan cu kisas pa añanan largo tabata traha sin cobertura social, a haya caminda pa SVB.
Algo hopi transcendental y importante pa SVB. Cu saneamento di seguro di malesa y cu e proceso di recuperacion di
AOV, a permiti pa dos aña sigui por duna un adaptacion di pensioen pa nos grandinan. E sistema di siguridad social
y seguronan social, a wordo fortifica y pa SVB e ta representa un reto grandi awor pa e decada nos dilanti, caminda
cu tin cu percura pa eleva e servicio cu ta duna na e clientenan, na e nivel cu ta cuadra tambe cu e tempo moderno cu
ta biba aden. Tin un plan caba, formula pa esaki, vision 2020, di banco di seguro social, SVB. Ta den plan di
ehecucion y tin pleno confiansa cu pa 2020, lo keda cla cu e vision aki tambe. E pueblo di Aruba, pasobra na final di
dia, tin henter e pueblo como nan cliente, lo ripara e beneficio, e facilidad y e accesibilidad di servicio di SVB pa nan
asuntonan.

Biniendo bek riba 2016, e seguro di e cambionan, e reforma cu a wordo treci padilanti, mas e boet administrativo, a
trece un desaroyo grandi den SVB. Ademas cu e cooperacion cu Dimas tambe tabata importante, pasobra a amplia e
cobertura. A bin constata un gran cantidad di persona cu permiso di trabao no tabata sigura y ta sigurando nan.

Tin rekisitonan cu tin cu cumpli cune y awor aki pa 2017, tin siguransa cu henter e poblacion cu tin permiso, lo ta
sigura na Banco di Seguro Social. Esey ta nifica cu e trahado por traha cu su proteccion financiero, cual SVB ta
suministra.

Un aña positivo, un aña di desaroyonan grandi, segun director di SVB, Edwin Jacobs