Page 69 - AHATA

Awe aparentemente e “grupo sabi” den politica di Aruba kier bolbe manipula cu loke
nan ta kere ta un comunidad cu nunca a bay school pa asina trece intrankilidad pa
Aruba y den e confusion cu nan ta crea, haya loke nan kier.

Si e supuesto grupo sabi ta kere cu nan por bolbe logra despista Aruba y laga e pais
cay den un trampa manera nan a haci cu baha BBO pa crea debe nacional, nan por
lubida.

Si e supuesto grupo sabi, ta kere cu e comision di supervision di Reino Caft por bira
otro Citgo pa manipula mente di pueblo, nan por cuminsa bay para bou di nubianan
pisa durante yobida pa asina nan haya poco frescura y reconoce e dificultad pa nan
logra.

E proyecto Citgo a duna prueba cu DIARIO ta capaz pa kibra e trampanan politico mas
grandi pa asina evita cu ta hinca pueblo di Aruba den otro wega pa asina haya poder.

“Bo Aruba” cu ta den man di husticia pa persigui tur cu a abusa di confiansa di un
pueblo cu awe mester paga caro pa e voto cu nan a deposita durante dos eleccion,
hunto cu Citgo ta prueba di loke e grupo sabi ta capaz di logra.

Awe Aruba ta paga cu dolor di un comunidad cu a lucha pa e ta riba pia pa abuso
gubernamental di e grupo di “hende sabi” cu realmente ta un berguensa pa politica.

Con por ta posibel cu hende inteligente ta crea un situacion financiero cu ta manda e

pais bankroet y ainda ta kere cu nan por sigui instiga, crea problema, destabilisa
Aruba?

Ta tristo cu hende sabi mester di e trapi di politica pa e yega caminda e kier yega y

sinti su mes poderoso.

Un hende realmente sabi no mester di manipulacion di pueblo pa alcansa loke e kier
alcansa.

Cu Citgo e grupo di sabi a haya chens di manipula e pueblo di Aruba. Na a haya chens
di entrega e comunidad di hende humilde y honrado di Aruba un proyecto cu nan mes
hamas por a kere aden, a menos cu nan ta kere den fantasma.