Page 19 - DVG

Esey t’e motibo cu ayera mainta a cuminsa na entrega n’e Management Team y nan hefe
directo un carta, pa despues entrega un copia di e carta na Minister Dangui Oduber. E ta
un carta firma pa tur e personal di e accion aki di DVG.

Tanto Management Team como hefe di seccion ta na altura di e problema aki, y nan mes
tambe a manda varios carta pa Minister pidiendo pa un solucion, mirando e situacion cu e
trahadornan ta den dje.

Segun Sharon Everts, nan mes a busca diferente opcion y solucion, pero mayoria di nan
material y mobilario ta den e edificio bieu, den van Leeuwenhoekstraat, y nan no por
wordo hiba na unda nan ta.

Tin biaha nan ta traha den koffiekamer, sala di reunion chikito of otro departamento. E ta
fastioso, pasobra ta sinta riba stoel- y mesanan cu a wordo “afgekeurd”, no tin nan
materialnan di trabou cu nan, no tin computer tur ora den cercania, ta inacesibel p’e
clientenan, pasobra no sa fiho unda nan ta sinta.

“El a bira un situacion imposibel pa nos sigui traha.” Dia 5 di juli ultimo, e grupo a sinta
cu nan Minister unda a trece tur e preocupacionnan aki dilanti y a propone un solucion
n’e mandatario. Na final a yega na un palabracion esaki ta encera cu asina cu scol
cuminsa, si e edificio riba Caya Watty Vos no keda cla, e mandatario lo ubica nan den un
otro edificio cu ta cla caba pa sigui cu nan trabou.

E mester ta un edificio adecuado pa ubica e 20 personanan cu ta traha den e seccion aki.
Pero no a cumpli cu ningun di e dos opcionnan aki, pa cual nan a dicidi di pone trabou
abou ayera mainta.

Nan mester a haya un contesta definitivo dia 19 di juli ultimo, pero no ta logra haya
contacto of reaccion di e mandatario. Inclusive nan sindicato TOPA tambe a haci algun
intento, pero sin resultado. Algun di e empleadonan a bay wak e espacio concerni y esaki
tabata “curu curu”, pues nada a wordo haci eynan pa nan por drenta e lugar. Ademas, e ta
chikito p’e cantidad di hende. Minister Dangui Oduber a bisa cu e lo ta cla den ocho (8)
siman, pero e periodo aki a pasa caba siman pasa diabierna.

E falta di lugar adecuado ta nifica cu nan campaña di vacunacion escolar no por sigui,
control medico na skol y consultanan di baby tampoco lo sigui.