Page 10 - KPA

ORANJESTAD (AAN): Un poco prome cu 3:45 pm, autoridad a haya informacion di un desgracia cu a socede riba
caminda di Playa pa Tanki Leendert, net dilanti Everbright Supercenter.
Un manehador di un motorcycle a bay pasa trafico, net ora cu un Hyundai Truck color blanco cu number DT-124,
tabata birando na su man robez pa subi parkinglot di e Supercenter.
E motociclista a purba hala, pero tog a dal masha duro mes den e truck. Esaki a pone e motociclista cay y keda
abao benta pabao di caminda. E motorcycle mes a keda como 3 meter mas panort di dje.
E impacto di e motociclista na e truck, a dobla e porta, y hasta ranca e bumper fuerte cu tin dilanti.
E motociclista tabata sclama di dolor y algun hende eybanda mesora a bay dune yudanza, y bise pa e keda
calmo. Entre nan por a mira un persona femenino kende ta mustra di tin conocemento di prome auxilio.
Polis a wordo yama mesora y Ambulans.
A resulta cu e tabatin un fractura complica for di su rudia banda drechi bay abao te na su enkel.
Ora cu Paramediconan a yega, mesora nan a stabiliza e pacient, y dune prome medicina pa alivia dolor, y despues
di a spalk su pia bon, a bay cune rumbo pa Servicio di Emergencia na Hospital. Polis a tuma tur dato eybao.
E hoben cu a bay “test-drive” un Scooter a keda deteni

Publication: Thursday, 30 March 2017. Categoria: Policial

ORANJESTAD(AAN): E hoben a wordo deteni! Ta trata di e hoben cu Diamars anochi a bay na un ciudadano cu
intencion di cumpra un Scooter “Gilera Runner” di 180cc.
Esaki DIARIO a trece dilanti den edicion di Diaranzon mainta.
E hoben a pidi pa “test drive” e Scooter prome, y e ciudadano a duna OK. E hoben a subi e Scooter y a bay dal un
bocht.
Mey ora despues, ainda e no a regresa, y e ciudadano a dicidi na bay Polis pa haci denuncia.
A indica na Polis, cu e hoben Jairo Jordan a bay cu e Gilera, pero no a regresa mas.
E hoben ta un conocido di Polis, y hopi biaha caba a haye envolvi cu Husticia na Aruba. Polis sa for di memoria
unda nan por haya e hoben aki. Mesora nan a subi caya y a acudi na un cas na Boroncana.
Y dicho hecho! Nan a bin haya dos sospechoso cu e Scooter. Nan a wordo aresta, y hiba pa Warda di Polis.
E hoben aki den pasado a haye envolvi caba den un asunto di atraco arma riba un Supermarket local. E ta
peligroso y momento a yega pa Instancianan concerni atende riba su comportacion, kizas dune guia pa e hoben aki
sali for di e mal rumbo, y stop di ta un menaza pa sociedad.