Page 28 - MIN VOS

Tuesday, 21 March 2017 08:15
Comparti

Nos a combersa cu Minister Alex Schwengle, kende a reacciona riba un cantidad di cuestionamento di
parti di oposicion riba asunto di Lotto. Hasta nan kier bisa cu Lotto por man den man di local, etc.
Minister Alex Schwengle ta e minister encarga y a topa cu CBN den mas cu un ocasion.

El a splica cu ta un lastima, pasobra e no tin gana di contesta e hendenan aki, pasobra nan no ta haci nan
huiswerk. Ta bon mes nan no ta den maneho. Por imagina si nan ta maneha e pais. Nan ta lubida pakico
e deal a wordo cera cu CBN. CBN tabata tey caba den comienso y e tabata haci maneho pa Lotto caba e
tey e tempo ey, pa loke ta hard y software pa e Lotto. Ya pa varios aña caba nan tabata tey, por bisa
durante gobernacion anterior bao di signatura di MEP. Na 2009, ora cu Gabinete Mike Eman I a sinta,
nan no a bin haya nada. Nan a laga Lotto basicamente bancarota. Esey ta loke no ta mustra pueblo. Esey
ta e inicio di e deal. Dado momento Lotto tabata asina peligroso financieramente mal maneha. Tin
documentacion di dje. A haci un investigacion di esey. E investigacion a bisa cu no por prueba cu nan a
horta, pero si por a prueba cu nan a mal maneh’e. Segun e minister, e instituto tabata tin miyones di debe
y ta berdad. Door cu ningun hende kier a toch’e, banconan tabata tin miedo di fia cen, pasobra no por a
ni paga prijs mas, e ora a papia cu CBN, cu ta un partner y door cu nan sa maneha loteria pa otro pais,
nan a ofrece pa maneh’e. Ningun negoshante no ta bay haci algo por nada. Lastima ta, cu berdad e ta
costa por ta 1 pa 2 miyon cu abo no ta haya, cu ta bay paga na un fee, cu porcierto tabata basta cen caba
prome y door di e debe cu nan a laga tras, mester a negosha e debe cu un banco y esey ta pagando te dia
di awe 2 miyon, cu por bay directamente pa deporte, door cu nan a maneha Lotto malisimo, lag’e casi
bancarota y pesey mes ta hayando menos placa pa deporte. Asina mes a negosha duro un aña largo cu
CBN. A negosha duro y nan a bay di acuerdo pa trece un adendum den e contract.

Tin algun cos cu mester wordo haci ainda pa haya mas placa pa deporte. Un di nan yama ley catochi
(landsverordening kansspelen). E ley ey tey caba na parlamento. E suplica di e minister ta pa cambi’e,
bisando di tal manera cu ta duna un bida largo pa Lotto, pero por lo menos garantisa Lotto cu e lo bay ta
e unico loteria den e proximo 15 añanan y e di dos punto cu e minister kier wak den dje, pero e
catocheronan lo duna 20% di nan gross revenue directamente na deporte. Lo bay tin por lo menos 10
miyon directamente pa deporte, segun e minister. Awo nan ta bay bisa cu nan ta bay dreche, e minister
kier mira con. Nan ta papia cheap. Bin cu cosnan concreto. Tin biaha e no ta haya gana pa ni contesta. Un
hende cu ta djis tira un piedra, ta un cobarde y charlatan. Bin cu cosnan concreto y bin mustra con ta
haci’e miho cu e minister. E minister lo bay tin mester di parlamento pa bin cu e ley di catochi di tal
manera cu lo bay tin e 10 miyon of mas pa deporte. Ora cu e bin, lo bay sinta den parlamento negosha
riba e ley eynan, e kier mira unda nan boca ta keda y unda nan voto lo keda, segun e minister.