Page 23 - bahasa Jawa kelas 8 sem 2_Neat

temen bocah saiki arang kang tlaten ngoceki piwulang kang kinandhut ing
tembang-tembang.
Kepriye to carane ndhudhah tinggalane para leluhur kita iki supaya kita
kabeh bisa njupuk piwulang kang adi luhung iku?
Ya, carane tetembangan mau supaya bisa dimangerteni dening sapa
bae kudu digancarake luwih dhisik (kaya piwulangan sing wis kita tindakake).
Sawise digancarake lan dingerteni maknane, tembang mau bakal luwih
gamblang menawa dicritakake maneh nganggo basa kang lumrah digunakake
ing jaman saiki. Kanthi mangkono, apa sing dikarepake dening pangripta bisa
katampa dening kita kabeh lan bisa dadi piwulang kang becik.

Gladhen :
Ayo tembang Dhandhanggula sing wis kokgancarake ing piwulangan
sadurunge iki critakna kanthi tinulis nganggo basamu dhewe. Sabanjure
wacanen ana ing ngarep kelas !

Kegiatan 3 : Mangun Teks Tembang Macapat Kanthi Mandhiri

Tugas 1: Ngarang Tembang Dhandhanggula lan Nembangake
Adhedhasar paugeran guru wilangan, guru gatra, lan guru lagu, watak
tembang, lan sasmita tembang kita bisa ngarang tembang macapat.

Gladhen :
Tindakna pakaryan iki:
(1) Gawea tembang macapat Dhandhanggula paling sethithik rong pada kanthi
tema bebas.
(2) Tembang asil karanganmu lagokna ana ngarep kelas!

Tugas 2 : Ndhokumentasekake Tembang Macapat Dhandhanggula
Budaya literasi kang saiki lagi dikembangake bisa ditindakake uga dening
para siswa. Salah sijine wujud budaya literasi yaiku ndhokumentasekake apa
wae asil karangane, kalebu ngarang tembang macapat Dhandhanggula kang wis
dilakoni siswa mau.

Gladhen:
Sawise kotembangake, kumpulna karanganmu bebarengan karo karangane
kancamu lan dijilid kanthi becik dadi buku.