Page 7 - Artemis_8_(September 2021)

Franz Geissler

D Grüllparty bam Gottfried (©Franz GEISSLER)

Goutt sei Daunk is hiaz da Lockdown aus

und mia diarfn wieda, vuarsichtig zwoar, owa douch, ausn Haus.
Voun meina Frau aus find ih bsundars scheïn,

dassih ah wieda oamui in da Woucha dearf ins Wiartshaus geïhn!
Neilich sein ma a Schibü Maunna zsaummangseïssn
und hobm a boar Spritza drunga und Chips dazui geïssn,
dou sogt af oamui da Archi, in Meïssna sei Bui:
„Wissts eh, af d Woucha houd insa Wiard dou leida zui,
weul a mid seini Kinda und sein Weib
af Kurzurlaub foahrt, nia-r-asou, zan Zeitvatreib!
Wou suimma dn daunn insarn Staummdisch mocha?

Mid deïm homma näimlich nid grechnd, mid suichani Socha!“
Olli miassma bled gschaud hobm. Af oamui möd’t si da Weïwa Gottfried:
„Wos hoits davoun: damma ba miar in Goartn grülln! Aniada bringt wos mid,
wos ma ba oana gscheidn Party sou brauchd!
Ih gfrei mi schoun, waunn meiGrülla wieda rauchd!
Schauts, deï Beschreïnkungan sein eh vuarbei,
si gibt jo dou nix scheïnas wia-r-a Glüllerei!“

Und sou woars daunn ah: da Hauns houd si gstölld ein
mid sein Souda-Stream und a boar Floschn Wein,
da Nazl houd si zweïgn d Huizkuihn umanaundagschaud
und da Bastl houd Kotlett in a guidi Batz neig’haud.
A Floschn Söwabreïnnda und zwoa Kistn Bier
staummtn voun insarn Födhirta, in Kasimir.
Da Beïckarl houd brouchd, no na, Gebäck und Brot
und da Alex, a glernda Kouch, Soußn und vaschiedani Solot.

Fiars Soizgebäck und d Möhspeis zuistäindich woar da Wurz,
damit insari „Siaßn“ und Noschkotzn nid keïmma z kurz.
Und ih hon ah wos beitrogn, si warad jo glocht,
ih hon mid frischi Biar und Sekt a Bowle gmocht.
Da Schurl houd midghobt, sou vül ih waß,
Speïck und Wirschtln, Bougarl, Gmias und an Kas.
Sou houd aniada nouch Lust und Laune sein Beitrog brocht
wos ma hoid sou braucht, waunn ma banaundahuckt bis in d Nocht,

niar nid da Bene, der oidi Schnorra,
der houd sein vafreïssanan Bruida midbrouchd,
voun da Nochbarurtschoft in Pforra!