Page 7 - bon-dia-aruba-20200919

a7
local Diasabra 19 september 2020

Aunke uso di tapaboca ta obligatorio na pia di trabao

Dunado di trabao no ta obliga pa duna tapaboca

For di inicio di augustus departamento di Salubridad
Publico (DVG) a recomenda pa bisti tapaboca of tapa
boca tur caminda. Pero e siman aki tapaboca su uso si
a bira uno obligatorio na pia di trabao como medida
preventivo pa evita mas caso alarmante di Covid
positivo.

Aunke e ta obligatorio pa usa tapaboca na pia di trabao, e
medida aki no ta obliga e dunado di trabao pa duna tapaboca
na nan trahadonan. Sinembargo gobierno no ta descarta cu
den caso extremo e doño di trabao ta percura pa tin cierto
material di proteccion pa e trahadonan.

"Pero ora ta trata di bo propio proteccion ta hopi importante
pa bo mes tin bo cos den bo man," Prome Minister Evelyn
Wever-Croes a bisa contestando pregunta di e matutino aki.

E uso obligatorio di tapaboca na pia di trabao tin un motibo di
peso. Na Aruba un 40% di e origen di e contagio cu e virus di
Covid ta sosode na pia di trabao. Asina Minister Presidente,
Wever-Croes a laga sa ora cu a informa riba e uso obligatorio
di tapaboca na pia di trabao diaranson ultimo.
Uso di tapaboca ta un paso importante, pero tambe mantene
distancia y reglanan di higiena. El a bisa cu e uso di tapaboca of
tapa boca ta algo personal di e trahado, y e ta urgi tur trahado
pa nan mes haci uso di tapa boca. Ademas e ta kere cu na nivel
cu nos ta aworaki relaciona cu Covid, tur ciudadano na Aruba
tin su tapa boca. Igualmente varios oficina tine caba tambe.
Ademas hopi hende a bira creativo trahando nan tapaboca
‘made in Aruba’ di bon condicion y calidad.

E mandatario a laga sa cu un 60% di origen di contagio ta
sosode den e nucleo di famia of na cas. Te ayera comunidad
tabata na expectativa si crisis team lo bin cu e medida di
shelter in place back of decreta ley seco of ambos, durante fin
di siman. E ta un forma pa forsa pa tur hende ta limita nan
movecion riba e dianan aki.

E mandatario ta considera e medidanan aki necesario pa
baha e cantidad di caso cu actualmente ta rond di 1309 caso
positivo activo. El a baha un poco mirando cu 386 persona
mas a recupera.