Page 16 - ATA

Diamars 28 November 2017 LocAL
A30

Ministernan Otmar Oduber y Dangui Oduber a reuni

riba desaroyo infrastructural

ORANJESTAD – E siman a habri cu reunion entre e mandatario
encarga cu infrastructura y esun di turismo. Hunto cu
nan tabata tey e director di DOW y tambe CEO di ATA. E
reunion aki a wordo teni pa asina delibera e desaroyonan
di infrastructura den area turistico y/of hotelero. Segun
minister Otmar Oduber, vision Infrastructural y turistico ta
riba mesun liña.

Segun un relato oficial di minister Otmar Oduber, a combersa
riba e prioridad cu mester tin pa e mehoracion di infrastructura
den area di ‘High Rise Hotels”, cu ta den un situacion bastante

deplorabel. A papia riba posibel mehoracion di e careteranan pero tambe e situacion di parkeo
den e area aki, pa por crea e facilidadnan necesario. Tambe a trata e sistema di rioleering cu
ta uno anticua y cu mester atencion, combina cu embeyecemento cu mester tuma luga den e
area aki tambe.

A reuni cu DOW, Minister y ATA pa mira con lo por tin un esfuerso conhunto pa logra trece e
cambionan infrastructural. Naturalmente esaki lo tuma un tiki mas tempo mirando cu kier hacie
na un manera efectivo. Lo hinca un planificacion cu ta encera full e trabou cu mester wordo
haci, Minister Oduber a splica. Otro areanan cu a papia riba dje ta e area unda cu barionan ta
yega y cu ta haya hopi biaha cu turistanan ta keda crusa riba caminda, cual ta obstaculisa e
trafico y causa congestion den centro di ciudad. Posibel solucion pa a problema aki ta, a pensa
pa bin cu tipo di reels manera cu tin na aeropuerto, pa evita cu bo ta haya cu turistanan ta crusa
tur caminda y na su luga ta dirigi nan na algun caminda specifico pa crusa caya. O mira hunto cu
Minister di Turismo DOW y ATA, con lo por yega na un pensamento y planificacion pa ehecuta
cambionan necesario cu ta yuda cu siguridad di e turista y e fluho di trafico.

E vision di minister encarga cu infrastructura y minister encarga cu turismo ta riba mesun liña
cual ta haci cu e trabounan ta bira hopi mas facil. Cosnan cu den pasado tabata keda pega
aworaki ta mira cu lo por inicia cu e proceso pa e trabounan por wordo haci, minister Otmar
Oduber a termina bisando.