Page 8 - AM211101

8 AWEMainta .com Dialuna, 01 November 2021

Líder di fraccion di AVP, mr. Mike Eman

E pakico introduccion di

huurtoeslag ta urgente

Ultimo tempo nos ta mira mas y mas veredictonan
di Corte caminda ta ordena ’ontruiming’ di cas,
pasobra huurder no por paga nan huur. Un situación
hopi doloroso p’e famianan cu ta haya nan mes
prácticamente riba caya. Esaki no ta algo cu nos por
laga empeora, e líder di fraccion di AVP, mr. Mike Eman
ta enfatisa.
Eman ta mustra cu den e “household survey” cu Banco

Central a haci y a publica su resultadonan na juli 2021
a resalta cu nos hogarnan a experiencia un perdida
severo di poder di compra.

E gastonan fiho – cu ta suma 61% di di e presupuesto
di nos hogarnan, a subi considerablemente. Den esaki,
según e survey di Banco Central, e gasto fiho di mas

grandi di nos hogarnan, esta e pago di huur, a conoce
un aumento grandi tambe.
Eman ta bisa cu ta pesey e cu colega Parlamentaria
mr. Gerlien Croes a inicia un proceso pa prepara un
ley di iniciativa pa introduci un yudansa financiero pa
famianan cu menos entrada haya un yudansa pa yuda
paga nan huur. Ta trata di un huurtoeslag, algo similar
cu e “reparatietoeslag” y “schoolkinderentoeslag” cu
AVP a introduci durante su gobernación.

Eman ta mustra cu den un situación di perdida di
entrada y poder di compra e hecho cu e gasto di huur
ta uno hopi fiho (non-discretionary) riba cual na cual
nan no tin hopi influencia ta haci e situación aun mas
difícil pa nos ciudadanonan cu ta biba den un cas of
apartamento na huur.

E hecho cu material di construcción a subi drásticamente
ultimo tempo lo sigui tin un influencia negativo riba e
prijs di huur di cas y apartamento.
Tambe Mike Eman ta bisa cu den e survey di Banco
Central famianan enquesta a duna di conoce di tin un
preocupación financiero hopi grandi.

36% a contesta cu nan ta sinti cu nan tin demasiado
debe. 47% a contesta cu nan tin un preocupación grandi

pa cu nan finanza. Ta bisto cu den comunidad tin hopi
dolor cu perdida di entrada, aumento di costo di bida
y debenanan acumula cu nos comunidad ta preocupa
cune. Den esaki hopi ta pagonan di huur atrása. Pesey
ta mira cu tin hopi casonan di ontruiming y famianan ta
perdiendo dak riba nan cabez.
P’e motibo aki e líder di fraccion di AVP, mr. Mike Eman

ta considera cu nan iniciativa pa bin cu un yudansa pa
paga huur den forma di un huurtoeslag ta urgentemente
necesario.