Page 50 - KPA_

Polisnan den les di naturaleza na Scol Primario Kudawecha

 May 5th, 2015
 Local

Pa completa nan estudio di MBO na Scol pa Polis, tur e Polisnan mester presenta un proyecto
basa riba un topico relaciona na e tema di medio ambiente. Entre otro e tarea aki ta inclui un
stage di algun luna. Esaki ta un proyecto cu ta tuma luga den e ultimo periodo di nan estudio y
cada grupo ta scoge su mesun tema y e opcionnan ta hopi, incluyendo sushedad, zeta, garashinan
ilegal y mas.
Un di e gruponan a scoge “turtuga” como nan enfoke y despues di a haci investigacion extenso
riba esaki a dicidi di trece e mensahe pa cu nan cuido y preservacion na e hobennan di Scol
Primario Kudawecha. E scol aki ta cay den e districto unda e studiantenan aki ta asigna, esta
Noord.
Stephanie Solognier ta un di e studiantenan cu a organiza e lectura, hunto cu nan docente y e
Polisnan di bario cu kende nan ta trahando actualmente.
E studiantenan a cubri diferente aspecto manera cua ta e tipo di turtuganan cu ta pone nan
webonan na Aruba, kico mester haci ora mira un turtuga subi tera, kico e rol di e turtuganan ta
den medio ambiente en general y kico por haci pa mantene nan sigur y salvaguardia nan for di
extension. A splica tambe tocante CITES, un acuerdo internacional cu Aruba tambe ta uza como
base pa proteccion di animalnan den peliger di extension.
Tiki tiki e turtuganan ta experenciando retonan serio y si no protege nan, nan lo disparce, cual lo
trece problemanan serio pa e ecosistema, Stephanie Solognier a comenta. Entre otro e turtuganan
ta hunga un rol den mantencion di nivel di oxigeno den lama, y si nan no t’ey mas, hasta e color
di santo lo cambia, segun Solognier a splica.