Page 51 - MIN.VOS 17 OCT,2015

A4

LOCALDiasabra 17 Oktober 2015

300 cliente di onderstand ta costa 3 miyon
300 coordinador ta costa 30 miyon!

Cu atencion nos a sigui e noticia di parti di ministro encarga cu Asunto Social, Hubentud y Labor,
unda e ta anuncia di a logra haya algo mas di 300 cliente di onderstand integra den mercado laboral
bek.

Por cierto esaki merece un pabien, ya cu e ministro corectamente a comprende cu ta su tarea, y
di cualkier cu yega na e puesto ey, pa tene e gastonan di onderstand mas abao posibel. Cu nos ta
corda den pasado no ta tur ministro encarga cu e cartera aki por bisa esey, y di e banda ey mester
elogia trabao di e ministro.

Den esaki no mester wak e aspecto financiero so, sino tambe e hecho cu esaki ta contribui na yuda
un persona bay den un situacion mas beneficioso, unda e mes por atende e necesidadnan di su mes
y su eventual famia cu su mes esfuerso pa bay dilanti traves di trabao paga, y esaki ta contribui na
un situacion social mas stabiel.

Pero e noticia aki ta yama nos atencion pa otro motibo tambe. E ministro concerni a anuncia
tambe cu e esfuerso aki lo haci un diferencia di tres (3) miyon den caha di gobierno, loke riba su
mes tambe ta bon noticia. Pero, con pa relaciona e logro aki cu e operacion financiero en general
di gobierno, sigur si nos sa cu mester tuma luga un cortamento basta severo den gasto pa aña
2016 pa logra e metanan estableci pa gobierno mes. Obhetivo ta di yega na 2016 na un deficit
presupuestario di solamente 2% di GDP, loke ta mas o menos 100 miyon (depende di e calculo di
gobierno o di CAFT).
Keto bay ta existi e situacion unda cu e oficinanan di e ministernan ta empleando demasiado
hende (bon paga) unda gobierno mes ta bisa cu nan ta mas o menos 365 persona, cu pa 2016 ta
consumi un total di mas di 38 miyon florin. Esaki ta cuadra cu e cifra general cu na 2014 e ministro
di Financia di e tempo ey, Juan David Yrausquin, mes tabata maneha, di un suma di 100.000 mil
florin pa cada puesto cu gobierno ta financia, cu e tempo ey tabata practicamente 7000 puesto,
entre ambtenaar y sector subsidia.

Sin kita ningun merito di e ministro di Asunto Social, Hubentud y Labor, ta keda necesario pa
percura pa e gastonan excesivo di e ‘hofhouding’ di e ministronan disparce y yega na mantene
solamente e staf estrictamente necesario. Mester bisa acerca cu e ministro concerni aki ta esun cu
por cierto ta luci miho entre su coleganan ya cu e ta esun cu tin menos hende na su oficina, y esaki
tambe ta di aprecia.

A base di e cifranan pa 2016 (di presupuesto) nos ta yega na e resumen aki di gasto di
salario y obligacionnan di dunado di trabao:
Asuntonan General (Prome Ministro): Afl 14.394.900
Infrastructura, etc. 6.068.700
Salubridad Publico 1.969.500
Enseñansa 2.636.200
Asunto Social, Labor, etc. 1.440.100
Husticia 3.247.200
Turismo, Transporte, etc. 2.675.000
Asunto Economico, etc. 3.440.600
Financia 2.397.700
Total Afl. 38.269.700

E problema persistente ta cu den e departamentonan mes, banda di e personal cu ta traha
directamente cu e ministronan, tin un cantidad di hende cu estudio universitario y HBO, cu no ta
ser utilisa adecuadamente segun e estudio y experiencia cu nan tin. De hecho nos ta financiando
dos aparato di apoyo pa e ministro: un cu e mes a scoge pa traha na su despacho, y e otro na e
departamento cu ta haya weso tira den nan direccion de bes en cuando. Di e manera aki Aruba
(cartera di e ciudadano) ta pagando demasiado pa un aparato cu ademas no ta mustra efectividad
den su operacion.
No ta pornada cu bao di insistencia di gobierno di Hulanda y CFT/CAFT, gobierno mes a pone
como meta pa corta e cantidad di contractant na mita. Unico problema ta cu manteniendo keto
bay mas di 350 hende na e despachonan di e ministronan y no ta bira visibel pa pueblo unda e
cortamento ta tuma luga anto.q