Page 7 - MIN ON 3 MAART 2016

Michelle Hooyboer-Winklaar: Stichting Rietveld Aruba ta
habri caminda pa HBO opleiding “Kunst en beeldende
vormen”

Wednesday, 02 March 2016 19:20
Tweet

Comparti

Aruba tin algun aña caba ta trahando riba establecimento di un scol di arte na nivel di HBO cu ta otorga
un titulo di Bachelor na e graduadonan.
A cuminsa cu un pre-program cu ta guia y prepara studiantenan pa nan aplicacion na un academia di
arte den exterior. E studiantenan ta wordo exponi na un spectrum amplio den disciplina di arte pa medio
di cursonan ofreci pa facilitadonan local y internacional, cu ta guia nan den traha un portfolio di calidad
halto cu nan por presenta ora nan aplica pa un institucion den exterior.
Pa tres aña largo ta ofreciendo e pre-program aki bao di guia di Glenn Godijn, kende ta un profesional cu
conexionnan valioso den e mundo di arte.
Cu e establecimento di Fundacion Rietveld Aruba ta formalisa e maneho di e academia y ta e forma e fase
final pa e establecimento di e Bachelor opleiding. E paso importante aki ta habri caminda pa hopi
oportunidad pa cu financiamento for di diferente institucion y organisacion, proyectonan special, y pa e
academia porfin por oficialmente bira un filial di e mundialmente respeta Rietveld Academie di
Hulanda.
Minister di Enseñansa Michelle Hooyboer-Winklaar tambe tabata presente na oficina di notario pa e
firmamento. E fundacion tin Alex Nieuwmeyer como Presidente, Marianne Abath como secretario y
Jerusha Rasmijn como miembro.
Minister Hooyboer-Winklaar ta hopi contento y satisfecho pa wak e sosten cu e academia ta ricibiendo pa
su formalisacion for di personanan cu ta bin di diferente funcion den arte, turismo y comercio y tin un
link cu arte y amor pa arte en general, y ta reconoce ademas e balor di arte en general cu nan apoyo.
E unico cos cu ta falta ta un fecha pa cuminsa oficialmente cu e HBO opleiding, e mandatario a remarca,
y esey nan ta spera di por anuncia den e siguiente lunanan.
Rietveld Academie Aruba lo ofrece un base mas amplio pa studia arte no solamente pa studiantenan
local, pero tambe studiantenan for di exterior. Lo ta trahando tambe pa atrae e studiantenan pa nos isla.
E institucion ta algo unico pa nos region, y e nomber "Rietveld" conecta na e nomber di Aruba ta
presenta oportunidadnan grandi y unico pa e isla den nos region y den e mundo di arte en general.