Page 14 - MIN JUS

ORANJESTAD – Diaranzon mainta Hues di Corte den Promer Instancia a dicta sentencia
den e caso penal cu Ministerio Publico a cuminsa contra e homber E.H. Hues a rechaza
e punto di bista di defensa y a bisa tambe cu e no ta kere nada loke e acusa a bisa.
Hues ta haya cu tin suficiente prueba cu ta mustra cu E.H. riba orden di Baba Ras a tira
mata Lisandro Webb. Hues a baha di e exigencia di Fiscal cu ta 22 aña y a condena E.H.
na 20 aña di prison.

For di aña pasa tratamento di e caso aki ta tumando lugar. Na December 2016, Hues
den su sentencia a bisa cu e kier pa haci mas investigacion. El a instrui pa bay scuchha
Baba Ras na Hulanda. Esey a pone cu luna pasa a sigui cu e tratamento y ayera
sentencia a cay.

E acusacion cu Fiscal a presenta contra e sospechoso E.H.(24) ta cu dia 19 Maart 2015
el a mata Lisandro Webb door di tira e victima den cabez. Fiscal ta considera E.H.
complice di asesinato. Mama di e difunto a duna Hues documentonan di entiero pa E.H.
paga e gastonan di entiero. Mas o menos 12 mil florin.

FISCAL A EXIGI 22 AÑA DI PRISON

For di tur investigacion, Fiscal ta conclui cu E.H. ta gaña. El a mustra cu aña pasa April
2015 a tuma DNA for di E.H. den KIA. A manda esaki Instituto Forence na Hulanda
(NFI). Door cu e investigacion a tarda, a laga E.H. liber. Investigacion riba DNA ta
mustra cu a haya E.H. su DNA na curpa di e victima. E momento ey E.H. tabata sera pa
un otro caso y e interoga E.H. pero e no kier bisa nada con su DNA por a bay riba curpa
di e victima.

Fiscal a bisa cu ta un hecho cu E.H. por haci uso di derecho di silencio. Fiscal a mustra
cu a base di sentencianan, mester mustra un sospechoso riba e consecuencianan di
keda keto. Den caso asina por conclui ora tin indicacionnan fuerte, cu e silencio ta den
contra di e sospechoso o sea por use den su culpabilidad.