Page 47 - MIN ON JUNE 23, 2015

Minister Hooyboer ta felicita participante nan cu e prome
“Shoco Sa Spel”

Publication: Tuesday, 23 June 2015. Categoria: General

ORANJESTAD (AAN): Un total di 45 alumno di klas 6 di e schoolnan basico Commandeur
Pieter Boerschool, Colegio Cristo Rey y school Basico Washington a participa dialuna mainta na
e proyecto piloto pa introduci “Shoco Sa Spel”.

Minister di Enseñansa Michelle Hooyboer-Winklaar y organizadonan ta hopi contento cu e
resultado, esta un tremendo bataya di “spelling bee” cu tabatin tur esunnan presente den un
tension grandi.

Den e di seis tanda, Zinzi Ho di Colegio Cristo Rey a resulta e competido mas fuerte entre e tres
participantenan cu a resta. Cu deletreo di e palabra “lechuga”, Zinzi a gana e proyecto piloto
Shoco Sa Spel.

E organizadonan, Ministerio di Enseñansa y Fundacion Bon Nochi Drumi Dushi, a scoge pa uza
Papiamento como e idioma pa e proyecto piloto. E “spelling bee” nacional na october lo ofrece
alumnonan e oportunidad pa scoge entre e cuater idiomanan mas uza na Aruba: e idiomanan
oficial Hulandes y Papiamento, mas Ingles y Spaño.

Na apertura di e evento, Minister Hooyboer-Winklaar a desea e hobennan hopi exito y a invita
dos alumno di Colegio Arubano, Denzell Browne y Raymond Browne pa introduci e rap/jingle
“Shoco Si, Shoco Sa”. Despues a introduci e miembronan di e hurado y a splica a reglanan y
proceso di e competencia.

Den e sala na EPI tabata colga un ambiente special, di entusiasmo, nervio y tension y – manera
den cualkier “spelling bee” – mita di e cantidad di alumnonan a keda elimina for di e
competencia den e prome mita. E hurado, consistiendo di Desiree Correa, Maureen Luidens y
Zuleika Silva a presenta na e alumnonan palabranan manera “lisimbein”, “djindja” y “siboyo”.

Na final di e seis tanda a keda den di tres luga, Nigel Gomez di Commandeur Pieter Boerschool
y den e di dos luga, Nashmalia Fullinck di Colegio Cristo Rey.