Page 44 - MIN ON JUNE 23, 2015
P. 44
“Shoco Sa Spel” ta prueba cu Papiamento mester ta mas
activo den enseñansa
Publication: Tuesday, 23 June 2015. Categoria: General
Cabesante di Colegio Cristo Rey ta masha orguyoso
ORANJESTAD (AAN): Cabesante di Colegio Cristo Rey di Brazil, Jani Stamper tabata masha
orguyoso y contento cu e resultado final. El a expresa cu e evento ta refleha e importancia pa
Papiamento drenta school, pero tambe a sirbi como un plataforma pa e hobennan socialisa y
competi cu otro den forma sano. Esaki tabata e prome reaccion di e cabesante di e school cu a
gana e competencia di “Shoco sa Spel”.
Un total di 45 alumno di klas 6 di e schoolnan basico Commandeur Pieter Boerschool, Colegio
Cristo Rey y school Basico Washington a participa dialuna mainta na e proyecto piloto pa
introduci “Shoco Sa Spel”.
Den e di seis tanda, Zinzi Ho di Colegio Cristo Rey a resulta e competido mas fuerte entre e tres
participantenan cu a resta. Cu deletreo di e palabra “lechuga”, Zinzi a gana e proyecto piloto
Shoco Sa Spel. Na final di e seis tanda a keda den di tres luga, Nigel Gomez di Commandeur
Pieter Boerschool y na di dos luga, Nashmalia Fullinck, tambe di Colegio Cristo Rey!
Meneer Jani Stamper a sigui bisa cu hopi hende ta hiba e expectativa y gana pa un dia
Papiamento drenta school pasobra a worde demostra cientificamente cu un mucha cu conoce e
reglanan di su lenga materno ta siña otro lenga mas lihe. El a agrega cu por ripara esaki cu
muchanan cu bin di exterior, kende ta siña Hulandes hopi lihe.
E muchanan a conta cu guia di nan maestronan y coachnan cu a yuda nan den prepara, uzando e
lista di palabra di Vocabulario di Papiamento cu nan a haya, Stamper a splica. Y por mira na nan
prestacion con tur school cu a worde acerca a prepara cu hopi seriedad, segun e cabesante.
E ingrediente di competencia semper ta keda y mester prepara bo muchanan, Stamper a expresa,
agregando cu e ta contento cu Minister Hooyboer-Winklaar su iniciativa pa engrandece
Papiamento y cu esaki ta un aporte na schoolnan pa hinca e idioma aki den nan curiculo.
