Page 10 - MIN JUS 13 APRIL 2016

baranca a kibra e glas di e auto y herida e homber B. den auto. E homber a perde conocemento y tabata
tur na sanger.
VICTIMA
E victima B. a sufri fractura na craneo, fractura na kaak y cashi di wowo. Hues ta considera esaki
heridanan severo. Hues a mustra cu e victima B. tambe a wordo interoga y el a bisa cu e no ta corda
nada nada mas. E no ta ni corda tempo cu e tabata chikito. Segun neurologo ta un milager cu ainda e ta
na bida. Segun e victima, e no por mira bon mas. El a bisa cu e no conoce e persona cu a dal’e cu
baranca. Na cas e ta siguiendo curso pa mira si e por sigui studia. El a bisa cu for di su mama e por a
compronde cu su intencion tabata pa bay sigui studia na Hulanda.
Fiscal a bisa cu si C.R. a bisa cu e ta lamenta loke a sosode, pakico el a bay for di e lugar. Cabez abou el a
bisa cu e no tabata sa kico pa haci. Fiscal a bisa cu un miembro di famia di e victima a bisa C.R. cu e
victima B. tabata grave. Pakico e no a bay polis e ora ey. Segun C.R., el a mira e homber ta traha como DJ
y a tende cu e ta mihor. E no sa kico tur el a sufri y no tabata sa con grave e ta.
BIDA PERSONAL
Presente den Corte di Husticia tabata tambe mayornan di C.R. Ora cu C.R. tabata splica con su situacion
actual ta, cual ta uno hopi dificil, su mama tabata yora. El a bisa cu e tabata preparando un snack truck y
no sa sali mes. El a bisa cu ora e sali, e lo bay percura pa su famia. Hues a bisa cu e victima lo bay
introduci un demanda di daño y C.R. mester tene cuenta cu esaki.
DEMANDA DI DAÑO
Abogado mr. Arends Marchena, den representacion di famia di e victima, a presenta e demanda di e
victima. El a mustra cu e mayornan tabatin un cantidad di gastonan. E abogado a splica cu ariba conseho
di neurologo mester a pone e victima den un camber su so den hospital. Esaki door di heridanan habri di
craneo y pa evita cu e por keda infecta. Awor e ta bou tratamento di psycologo y neurologo y cu ta su
mayornan ta pagando esaki. Dentista tambe mester a paga pa drecha djiente den boca. E abogado a
sigui bisa cu e victima mester bebe medicamentonan pa purba yuda su memoria. Mester a busca hende
pa cuida y atende na cas. Tambe e ta hayando enseñanza na cas pa mira si e ta recobra su educacion.
Tambe mester a busca un cacho pa e cuida, cual lo por stimula su celebro, pa yud’e corda cu e tin cierto
responsabilidad. Mayornan di B. mester a remodela un camber completo pa asina por acomoda y cuida
B. E tabata 6 dia for di deb coma den Cuido Intensivo. E abogado a bisa cu ademas di e demanda di mas
di 15 mil lo bay cuminsa un caso civil pa gastonan adicional. Hues a puntra C.R. kico e ta pensa di e
demanda. Segun C.R. e ta dispuesto pa paga pero poco poco.
EXIGENCIA DI FISCAL
Fiscal a bisa Hues cu esaki ta un caso hopi tristo pa C.R. y e victima B. C.R. a coy baranca y tira riba e
homber B. door cu e tabata rabia. A consecuencia di e maltrato, B. a keda handicap. Fiscal ta puntra si
C.R. a haci’e intencional. E acusacion ta mustra riba maltrato severo. Si a tira baranca riba auto, ta papia
di intento di mata intencional. Mirando con tur cos a sosode, fiscal ta haya cu aki no por papia di intento
di mata pero si di maltrato severo intencional. Den e auto tabatin en total 4 persona kendenan a conta
kico a pasa. Fiscal a bisa cu el a spanta ora el a mira e baranca grandi. C.R. a coy e baranca aki y tira cu
forza riba e auto. A kibra e glas di e auto y a dal B. den cabez. A tira cu asina forza cu a causa fractura na
craneo. Na opinion di Fiscal, si a tira cu asina forza, C.R. a tuma riesgo cu por causa herida severo.
Pa cu e castigo, Fiscal a bisa cu e ta tene cuenta tur e consecuencianan pa e victima B. Un accion bobo di
C.R. a causa cu a perhudica henter bida di B. Danki Dios cu B. no a fayece pero tur su plannan di bida, a
keda perhudica. Fiscal ta tuma C.R. na malo pa esaki.
Na opinion di Fiscal, C.R. despues di sinta su castigo, ta sali for di KIA y por hasi su bida di nobo. B. si no
por haci esaki. E kier a bay studia na Hulanda pero awor tur cos a cambia. Un hoben manera B. no por
haci nada. Fiscal a bisa cu e ta haya lamentable cu C.R. no a busca drechi di e victima. E no a bay Polis pa
mira con a para. El a dicidi di warda. Fiscal a bisa cu e ta kere cu enberdad C.R. ta duele masha loke a
sosode. Di otro banda, B. a perde un gran parti di su bida y awor mester cuminsa completo.